par Charles Dickens - wikia.nocookie.net

en cameras cual ia parteni a un ves pasada a se asosior mor. Los es un suite despresante de salas
en un construida grande e grimante en un stradeta, do el aspeta tan nonarmonios ce on pote
apena evita fantasia ce el ia core ala cuando el ia es un casa joven, a media de un jua de asconde
con otra casas, e ia oblida la via de sorti. El es aora vera vea e vera triste, car sola Scrooge abita
en el; tota la otra salas es luada como ofisias. La stradeta es tan oscur ce an Scrooge, ci conose
cada de se petras, es obligada de palpa con se manos. Tan multe nebla e jelada pende sirca la
porte vea e negra de la casa ce pare como si la Spirito de la Clima senta a la limita en medita
lamentante.
Bon, es un fato ce la bateporte de la casa ave vera no cualia spesial, estra ce el es multe
grande. Es ance un fato ce Scrooge ia vide el, a cada note e matina, per tota se abita en esta loca,
e ance ce Scrooge posese la cualia nomida "imajina" en un grado tan pico como cualce om en la
site de London, an si on inclui – en un ajunta noncortes – la corpora, conselores e uniformadas.
Ta ce on conserva ance en se mente ce Scrooge ia dona an no un pensa a Marley pos se refere
ultima a se asosior, mor per sete anios, en esta posmedia. E alora, ta ce cualcun esplica a me, si
el pote, como aveni ce Scrooge, teninte se clave en la securador de la porte, vide en la bateporte
– sin ce esta sufri cualce prosede de cambia en la entretempo – no un bateporte, ma la fas de
Marley.
La fas de Marley. El no sta en ombra nonpenetrable como la otra ojetos en la stradeta, ma el
ave un lus sombre de se mesma, como un omaro putrida en un susolo oscur. El no es coler o
feros, ma el regarda Scrooge como Marley ia regarda a ante: con un oculo fantasmin puiada a
supra sur se fronte fantasmin. La capeles es strana tisada, como si par respira o aira calda; e, an
si la oios es plen abrida, los es intera nonmovente. Par esta, e se color blu gris, el es asustante;
ma se teror pare esiste separada de la fas, e estra se controla, en loca de como un parte de se
espresa propre.
An cuando Scrooge fisa esta fenomeno con se regarda, el es denova un bateporte.
Ta es nonvera si me ta dise ce Scrooge no es surprendeda, o ce se sangue no es consensa de
un senti asustante cual es stranjer a el de pos se enfantia. Ma el pone se mano sur la clave cual el
ia sede, torse el en un modo determinada, entra, e ensende se candela.
An tal, el pausa per un momento de nonsertia ante clui la porte; e an tal, el comensa par
regarda cauta pos la porte, como si el espeta partal es terorida par vide la coda de cavalo de
Marley protende en la atrio. Ma ave no cosa sur la retro de la porte, estra la vises e torcas cual
teni la bateporte, donce el dise "Ba, ba!" e clui el con un pum.
La ruido resona tra la casa como tona. Cada sala a supra, e cada baril en la susolos de la
mercator de vino a su, pare ave un serie individua de ecos per se mesma. Scrooge no es un om
ci es asustada par ecos. El fisa la porte, e traversa la atrio, e asende la scalera – an lenta –
sisorinte la mexa de se candela sur se via.
On pote parla idiomal de asende un bon scalera vea en un vagon de ses cavalos, o de gida un
tal vagon tra un mal ata nova de parlamento, ma me vole dise ce on ta pote asende esta scalera
en un veculo funeral, an ladal fasante, con la bara de molas asta la mur e con la porte asta la rel
de mano – e asende fasil. La largia ta sufisi per esta, e no ta es an plen ocupada; e cisa esta es la
razona per cual Scrooge pensa ce el vide un veculo funeral de motor cual presede el en la
oscuria. An un sesuple de lampas de gas prendeda de la strada no ta lumina tro bon la atrio,
donce tu pote suposa ce el es vera oscur con la candela de sebo de Scrooge.
Scrooge asende, ajitada par esta a no grado. La oscuria es barata, e Scrooge gusta el. Ma ante
clui se porte pesos, el pasea tra se salas per vide ce tota es en ordina. El ave un recorda minima
ma sufisinte de la fas per desira fa esta.
Salon, sala de dormi, sala de caxas. Tota es como los debe es. Nun su la table, nun su la sofa;
un foco peti en la ximineria; la culier e bol preparada; e la caserol de gaxa (Scrooge ave cataro
en se testa) sur la cornisa. Nun su la leto; nun en la saleta; nun en se roba de bani, cual pende
con un aspeta suspetos contra la mur. Sala de caxas como usual. Gardafoco vea, sapatos vea, du
sestos de pexa, lavabo sur tre pedes, e un tisador.
Plen sasiada, el clui se porte e securi se en se sala; el torse la clave a du veses, cual no es se
abitua. Securida en esta modo contra surprende, el despone se tela de colo, pone se roba de bani
e pantoflas, e se xapo de note, e senta se ante la foco per come se gaxa.
7