par Charles Dickens - wikia.nocookie.net

"Si los ta prefere mori," – Scrooge dise – "ta ce los fa, e redui en esta modo la suprapasa de
popla. Plu – pardona me – me no sabe acel."
"Ma cisa tu ta pote sabe el." – la senior comenta.
"El no conserna me." – Scrooge replica – "Sufisi ce un om comprende se consernas propre, e
no interfere con los de otra persones. Me es constante ocupada par me consernas. Bon dia,
seniores!"
Vidente clar ce continua la discute ta ave no valua, la seniores retira se. Scrooge recomensa
se laboras con un opina plu bon de se mesma, e en un umor plu bromos ce se moda abitual.
En la entretempo, la nebla e oscuria deveni tan densa ce persones core de asi a ala con torxas
flaminte, ofrente se servis de vade ante la cavalos e vagones per gida los sur se vias. La tore
antica de un eglesa, de cual se campana vea roncin regarda abitual Scrooge en un modo rusos
tra un fenetra gotica en la mur, deveni nonvidable, e sona la oras e cuatris en la nubes, segueda
par vibras tremante como si se dentes clica en se testa jelada, ala a supra. La fria deveni intensa.
En la strada xef, a la canto de la stradeta, alga laborores repara la tubos de gas, e ia ensende ja
un foco grande en un brasero, sirca cual un grupo de omes e xicos vestida en trapos es colieda,
caldinte se manos e giniante se oios en estasia ante la incandese. Car la idrante es lasada en
solitaria, se supraflues conjela malumoros e deveni un jela misantropial.
La brilia de la botecas, do talos e bacas de ilex crepita en la caldia de la lampas de la fenetras,
fa ce fases pal aspeta roja cuando los pasa. La comersia de carne de avia e otra comedas deveni
un broma mervelios: un estravagante glorios, en cual on ia pote apena persepi un relata con la
prinsipes noiante de negosia e vende. La Maior de London, en la fortres potios de Mansion
House, dona comandas a se sincodes cosinores e servores ce los ta onora la natal como conveni
en la casa de un maior; e an la talior peti, a ci el ia multa sinco xilinges a la lundi presedente
cuando el ia es ebra e violente en la stradas, misca la deser festos de doman en se atico, an
cuando se sposa magra e la bebe sorti per compra la carne de bove.
Ancora plu neblos, e plu fria. La fria penetra, fora, morde. Si sola la bon San Dunstan ta pinsi
la nas de la Mal Spirito con un poca de tal aira como esta, en loca de usa se arma conoseda,
alora la Diablo ta ruji vera per un razona forte. La posesor de un nas joven e peti, rodeda e
masticada par la fria fama como osos es rodeda par canes, basi se a la buco de clave de Scrooge
per regala el con un canta de natal; ma a la sona prima de
"Bondis' a tu, me bon senior!
Un vive sin angus'!"
Scrooge saisi la regla en un ata tan enerjios ce la cantor fuji en teror, lasante la buco a la nebla, e
a la jelada cual es an min bonveninte.
La ora de clui la sala de contas ariva final. Nonvolente, Scrooge desmonta se sejeta e, sin
parola, indica la fato a la secretor espetante en la tance, ci estingui direta se candela e pone se
xapo.
"Tu va vole doman ave tota la dia, me suposa?" – Scrooge dise.
"Si esta conveni, senior."
"El no conveni," – Scrooge dise – "e el no es justa. Si me ta sutrae un dui de un corona per el,
tu ta opina ce me maltrata tu, me es serta?"
La secretor surie debil.
"E an tal," – Scrooge dise – "tu no opina ce tu maltrata me cuando me paia la salario de un
dia per no labora."
La secretor comenta ce la festa aveni a sola un ves anial.
"Un escusa povre per fura la bolsa de un om a cada dudes-sinco de desembre!" – Scrooge
dise, botoninte se jacon pesos asta se mento. – "Ma me suposa ce tu debe ave la dia intera. Veni
asi an plu temprana a la matina seguente."
La secretor promete ce el va obedi; e Scrooge sorti con un ronca. La ofisia es cluida pos un
momento corta, e la secretor, de cual la finis longa de se scarfa blanca pende su se taie (car el
posese no jacon), lisca longo la strada jelada de Cornhill a dudes veses, a la fini de un serie de
xicos, per onora la sera de natal, e alora el core a se casa en Camden Town, tan rapida como
posible, per fa la jua de la sieca.
Scrooge fa sombre se come de sera en se restorante sombre abitual; e pos leje tota la jornales
e pos pasa gustable la resta de la sera con se libro de bancor, el vade a casa per dormi. El abita
6