par Charles Dickens - wikia.nocookie.net

"Car tu ia es enamada!" – Scrooge ronca, como si esta ta es la cosa unica plu riable en la
mundo ce un bon natal – "Bon dia!"
"Ma no, tio, tu ia veni nunca per visita me ance ante acel aveni. Per ce tu dona el como un
razona per no veni aora?"
"Bon dia." – Scrooge dise.
"Me desira no cosa de tu; me xerca no cosa de tu; per ce nos no pote es amis?"
"Bon dia." – Scrooge dise.
"Me es triste, con tota me cor, trovante tu es tan ostinos. Nos ia fa nunca un disputa en cual
me ia es un partisipor. Ma me ia fa la atenta per onora la natal, e me va manteni me bon umor de
natal asta la fini. Donce: bon natal, tio!"
"Bon dia!" – Scrooge dise.
"E bon anio nova!"
"Bon dia!" – Scrooge dise.
Se sobrino sorti de la sala sin parola coler, an tal. El pausa a la porte esterna per dona la
salutas de la saison a la secretor, ci, an si fria, es plu calda ce Scrooge, car el redona los en un
modo cortes.
"Ave ala un otra om," – Scrooge murmura, ci oia el sin intende – "me secretor, con des-sinco
xilinges per semana, e un sposa e familia, ci parla de un bon natal. Me va retira me a la
dementeria."
Esta demente, en lasa la sobrino de Scrooge sorti, ia lasa du otra persones entra. Los es
seniores alga obesa, de aspeta plasente, ci sta aora, con se xapos desponeda, en la ofisia de
Scrooge. Los ave libros e paperes en se manos, e los inclina se ante el.
"La boteca de Scrooge e Marley, me crede." – un de la seniores dise, consultante se lista. –
"Me ave la plaser de parla a senior Scrooge o senior Marley?"
"Senior Marley es ja mor per la sete anios pasada." – Scrooge responde. – "El ia mori ante
sete anios, a esta note se mesma."
"Nos ave no duta ce se jenerosia es bon representada par se asosior survivente." – la senior
dise, presentante se documentos de identia.
E serta es tal, car los ia es du spiritos simil. A la menasa de la parola "jenerosia", Scrooge
fronsi se suprasiles, e scude se testa, e redona la documentos.
"A esta saison festos de la anio, senior Scrooge," – la senior dise, prendente un pen – "nos
desira plu ce usual ce nos ta furni alga donadas peti a la povres e miseras, ci sufri vasta a la
tempo presente. Multe miles no ave la nesesadas comun; sentos de miles no ave la comfortas
comun, senior."
"Esce ave no prisones?" – Scrooge demanda.
"Multe prisones." – la senior dise, reposante denova la pen.
"E la casas de labora parocial?" – Scrooge demanda. – "Los opera ancora?"
"Si, los opera. An tal," – la senior responde – "me desira ce me ta pote nega acel."
"E la paseadores de la prisonidas, e la lege de la povres – los es plen enerjios, si?" – Scrooge
dise.
"Ambos es multe ocupada, senior."
"O! Me ia teme, pos tu informa prima, ce alga cosa ia aveni per para los sur se curso usos." –
Scrooge dise. – "Me es multe felis de oia la nega."
"Su la impresa ce los no dona vera un felisi cristian de mente o corpo a la popla," – la senior
responde – "alga de nos atenta cumula un reserva per compra per la povres alga carne e bevidas
e modos de caldi. Nos ia eleje esta tempo car el es un tempo, entre tota otras, cuando la Manca
es agu sentida e la Abunda es joios. Per cuanto me ta enscrive tu?"
"Zero!" – Scrooge responde.
"Tu desira es anonim?"
"Me desira ce on lasa me es solitar." – Scrooge dise – "Car vos demanda de me desira,
seniores, acel es me responde. Me no regala me mesma con joia a natal, e me no pote tolera la
costa de regala persones pigra con joia. Me aida suporta la instituidas a cual me ia refere – los
costa bastante – e los ci es povre debe vade ala."
"Multe no pote vade ala; e multe ta prefere mori."
5