par Charles Dickens - wikia.nocookie.net

"Esce tu mestre es a casa, me cara?" – Scrooge dise a la servor. Un bon xica! Vera.
"Si, senior."
"Do el es, me dulse?" – Scrooge dise.
"El es en la sala de come, senior, con la mestresa. Me ta gida tu a supra, per favore."
"Grasias. El conose me." – Scrooge dise, con se mano ja sur la securador de la sala de come.
– "Me va entra asi, me cara."
El torse jentil la manico, e introdui se fas, a lado de la porte. Los regarda la table (cual es
decorada en un estende grande), car acel casores joven es sempre nervos de tal cosas, e los gusta
vide ce tota es coreta posada.
"Fred!" – Scrooge dise.
Par me cor e vive cara, se sobrina par sposi salta tan! Scrooge ia oblida ja, a esta momento, ce
la sobrina senta en la angulo con la reposapede, o el no ta esclama en acel modo, per cualce
razona.
"Ta ce Dio bondise me!" – Fred cria – "ci es ala?"
"Es me. Tu tio Scrooge. Me ia veni per la come. Tu ta lasa me entra, Fred?"
Lasa el entra? Nos es fortunos ce el no presa se mano a via! Scrooge deveni ja comfortos pos
sinco minutos. No situa pote es plu zelos. Se sobrina ave esata la mesma aspeta. Ance Topper
cuando el veni. Ance la sore ronda cuando el veni. Ance tota cuando los veni. Un selebra
mervelios, juas mervelios, acorda mervelios, felisia mer-vel-ios!
Ma el ariva temprana a la ofisia a la matina seguente. O, el ariva temprana. Si sola el pote
ariva prima, e trapi Bob Cratchit en se ariva tarda! Esta es la cosa cual el anela aora.
E el susede; si, el susede! La orolojo sona la ora nove. Bob manca. Un cuatri. Bob manca. El
es nonpuntual par no min ce des-oto minutos e un dui. Scrooge senta con se porte plen abrida,
afin el vide Bob entra la tance.
Se xapo es desponeda ante cuando el abri la porte; ance se scarfa. El senta sur se sejeta pos
un momento, laborante intensa con se pen, como si el atenta retrova la ora nove.
"Alo!" – Scrooge ronca, en se vose abituada, tan prosima como el pote finje – "Per ce tu veni
asi a esta ora de la dia?"
"Me regrete multe, senior." – Bob dise – "Vera, me es tarda."
"Tu es?" – Scrooge repete – "Si. Me crede ce tu es. Veni asi, senior, per favore."
"El aveni a sola un ves anial, senior." – Bob prea, aparente de la tance – "Me no va repete.
Me ia fa ier un selebra alga joios, senior."
"Ma ta ce me esplica a tu, me ami," – Scrooge dise – "me no va tolera plu esta spesie de
condui. E donce" – el continua, saltante de se sejeta, e donante a Bob un tal puia de codo a se
jaceta ce Bob bambola a retro en la tance denova – "e donce me es a punto de alti tu salario!"
Bob trema, e vade poca prosima a la regla. Per un momento, el ave la idea ce el pote usa el
per colpa Scrooge de sur se pedes, teni el, e clama a la persones en la stradeta per aida e un
camison de restrinje.
"Bon natal, Bob!" – Scrooge dise, con un seria cual on no pote malcomprende, colpante el a
la dorso en un modo zelos – "Un natal plu bon, Bob, me bonom, ce me ia furni a tu per multe
anios! Me va alti tu salario, e atenta aida tu familia lutante, e nos va discute vos relatas a esta
posmedia se mesma, supra un bol de ponxe calda de natal, Bob! Prepara la focos, e compra un
caxa nova de carbones ante la puntua de un plu letera i, Bob Cratchit!"
47