par Charles Dickens - wikia.nocookie.net

La xico parti como un baleta. Cualcun ci pote xuta un baleta con an un dui de acel rapidia ta
ave se mano constante a la gatio.
"Me va envia el a Bob Cratchit!" – Scrooge xuxa, fricante se manos, e esplodente con rie –
"El no va sabe ci ia envia el. El es plu grande ce Tim Pico a du veses. La umoristes ia fa nunca
un tal broma como envia esta a Bob!"
La mano par cual el scrive la adirije no es sin tremas, ma el scrive el en alga modo, e desende
per abri la porte xef, en prepara per la veni de la om de la carnor. An cuando el sta ala, espetante
la ariva, la bateporte saisi se oio.
"Me va ama el tra tota me vive!" – Scrooge esclama, colpetante el con se mano – "Me ia
regarda apena el a ante. El ave un espresa tan onesta en se fas! El es un bateporte mervelios! –
Ave asi la pavo! Alo! Ui! Como vade? Bon natal!"
E esta es vera un pavo! Acel avia ia pote nunca sta sur se gamas. El ta rompe los a pesos
corta en un minuto, como bastos de sira de selo.
"Ma vera, nonposible es porta acel a Camden Town." – Scrooge dise – "Ta ce tu usa un
caro."
La cacareta con cual el dise esta, e la cacareta con cual el paia per la pavo, e la cacareta con
cual el paia per la caro, e la cacareta con cual el recompensa la xico es suprapasada sola par la
cacareta con cual el senta se denova en se seja, con manca de respira, e el cacareta asta cuando
el larma.
Rasa se no es un taxe fasil, car se mano continua scude vera multe; e per rasa se on nesesa
atende, an si on no dansa cuando on fa la taxe. Ma si Scrooge ta talia la fini de se nas a via, el ta
pone un peso de bandeta medical sur el, e ta es plen contente.
El vesti se "en tota se modo la plu bon", e final emerji a estra. A esta tempo, la persones es ja
fluente tra la stradas, como el ia vide los con la Fantasma de Natal Presente; e, paseante con se
manos pos se dorso, Scrooge regarda cadun con un surie deletada. En resoma, el aspeta tan
nonresistable plasente ce tre o cuatro omes bonumoros dise: "Bon matina, senior! Bon natal a
tu!" E Scrooge dise a pos, a multe veses, ce de tota la sonas joios cual el ia oia ja, estas ia sona
la plu joios en se oreas.
El no vade longa ante cuando el vide la senior alga obesa prosimi a el – el ci ia entra en se
sala de contas a la dia presedente e ia dise – "La boteca de Scrooge e Marley, me crede?" Un
dole pasa tra se cor cuando el pensa como esta senior vea va regarda el cuando los encontra; ma
el sabe cual curso estende direta ante el, e el segue el.
"Me senior cara." – Scrooge dise, rapidinte se pasos, e prendente la senior vea par ambos se
manos. – "Como vade? Me espera ce tu ia susede ier. Tu ia ata multe amable. Bon natal a tu,
senior!"
"Senior Scrooge?"
"Si." – Scrooge dise – "Acel es me nom, e me teme ce cisa el no plase tu. Permete ce me
demanda per tu pardona. E esce tu ta es tan jentil ce..." – asi, Scrooge xuxa en se orea.
"Ta ce Dio bondise me!" – la senior esclama, como si se respira es saisida – "Me senior
Scrooge cara, tu es seria?"
"Per favore." – Scrooge dise – "An no min par un penig. Un cuantia grande de paias
posponeda es incluida, me serti a tu. Tu va fa esta favore per me?"
"Me senior cara." – la otra dise, presante se mano con el – "Me no sabe como responde a tal
jener—"
"No responde, per favore." – Scrooge replica – "Veni per vide me. Tu va veni per vide me?"
"Serta!" – la senior vea esclama. E es clar ce el intende fa esta.
"Grasias." – Scrooge dise – "Me es multe obligada a tu. Me grasia tu a sincodes veses.
Bondises!"
El vade a eglesa, e pasea tra la stradas, e oserva la persones ci freta de asi a ala, e toca la
testas de enfantes, e conversa con mendicores, e regarda a su en la cosinas de casas, e a supra a
la fenetras, e trova ce tota cosas pote furni plaser a el. El ia fantasia nunca ce cualce pasea – ce
cualce cosa – pote dona tan multe felisia a el. En la posmedia, el verje se pasos en dirije a la
casa de se sobrino.
El pasa la porte a un desduple de veses, ante trova la coraje per prosimi e bateta. Ma el ata
subita e susede:
46