"Me va onora natal en me cor, e va atenta onora el tra tota la anio. Me va vive en la pasada, la presente e la futur. La spiritos de tota la tre va labora en me. Me no va esclui la lesones cual los ensenia. O, dise ce me pote frota a via la scrive sur esta petra!" En se angusa, el saisi la mano fantasmal. La fantasma atenta libri se, ma Scrooge es forte en se prea, e el teni ancora el. La spirito, an plu forte, forsa el a via. Levante se manos en un prea ultima per reversa se fortuna, el vide un altera en la capeta e roba de la fantasma. Esta diminui, colasa, e redui se a un colona de leto. 44
Strofe 5 La fini de la cosa Si! E la colona de leto es se propre. La leto es se propre, la sala es se propre. E la cosa la plu bon e felis de tota es ce la tempo futur es se propre, en cual el pote compensa! "Me va vive en la pasada, la presente e la futur!" – Scrooge repete, en cuando el trepa rapida de se leto. – "La spiritos de tota la tre va labora en me. O, Jacob Marley! Ta ce on loda la sielo e la tempo de natal per esta! Me dise esta sur me jenos, Jacob Vea, sur me jenos!" El es tan emosios e tan ardente con se bon intendes ce se vose balbutante pote apena responde a se clama. En se luta con la spirito, el ia sanglota forte, e se fas es moiada <strong>par</strong> larmas. "Los no es tirada a su," – Scrooge esclama, pliante un de se cortinas de leto en se brasos – "los no es tirada a su, an la anelos. Los es asi – me es asi – me pote desa<strong>par</strong>e la ombras de la avenis cual ta deveni real. Me va des<strong>par</strong>e los. Me sabe esta!" Se manos es ocupada con se vestes tra tota esta tempo, reversante los, portante los en modo inversada, laserante los, ponente los en maneras strana, aidada <strong>par</strong> los en cada spesie de estravagante. "Ce me ta fa? Me no sabe!" – Scrooge cria, riente e larmante en la mesma respira, e imitante perfeta la sculta de Laocoonte <strong>par</strong> se calsas. – "Me es tan lejera como un pluma, me es tan felis como un anjel, me es tan joios como un xico. Me es tan mareada como un ebra. Un bon natal a tota! Un bon anio nova a tota la mundo. He, alo! U! Ui!" El ia brinca ja a la salon, e sta aora ala, con un manca grande de respira. "Ave ala la caserol cual ia conteni la gaxa!" – Scrooge esclama, recomensante, e dansante sirca la ximineria. – "Ave ala la porte, tra cual la fantasma de Jacob Marley ia entra! Ave ala la angulo do la Fantasma de Natal Presente ia senta! Ave ala la fe<strong>net</strong>ra do me ia vide la spiritos vagante! Tota es bon, tota es vera, tota ia aveni! Ha ha ha!" Vera, per un om ci no ia pratica se rie per tan multe anios, el rie en un modo mervelios, la plu eselente: la padre de un linia longa, longa de ries briliante! "Me no sabe cual dia de la mense nos ave!" – Scrooge dise – "Me no sabe per cuanto tempo me ia es entre la spiritos. Me sabe no cosa. Me es como un bebe. No importa. Es egal a me. Me ta prefere es un bebe. Ui! U! He, alo!" Se estasias es pausada <strong>par</strong> la eglesas, de cual se campanas crea sonas la plu vivos cual el ia oia ja. Pum, pam, pada; tin, tan, tal! Tal, tan, tin; pada, pam, pum! O, glorios, glorios! Corente a la fe<strong>net</strong>ra, el abri el, e protende se testa. No nebla, no nebleta; clar, solos, felis, emosios, fria; fria, sibilante tal ce la sangue dansa; lus oro de sol; sielo divin; aira dulse e fresca; campanas joios. O, glorios! Glorios! "Cual es la data?" – Scrooge cria, clamante a su a un xico en se vestes de soldi, ci ia entra la stradeta per regarda, cisa. "Ce?" – la xico replica, con tota se fortia de stona. "Cual es la data, me bon xico?" – Scrooge dise. "Oji?" – la xico responde – "Ma la dia de natal." "Es la dia de natal!" – Scrooge dise a se – "Me no ia perde el. La spiritos ia fa tota en un note. Los pote fa cualce cosa cual los vole. Natural los pote. Natural los pote. Alo, me bon xico!" "Alo!" – la xico replica. "Esce tu conose la carnor de avia, en la strada pos la visina, a la canto?" – Scrooge demanda. "Me ta espera ce me conose el." – la enfante responde. "Un xico intelijente!" – Scrooge dise – "Un xico notable! Esce tu sabe si los ia vende ja la pavo valuada cual ia pende ala? No la pavo peti, ma la grande?" "Acel cual es tan grande como me?" – la xico replica. "Un xico deletos!" – Scrooge dise – "Parla con el es un plaser. Si, me joven!" "El pende ala aora." – la xico responde. "Si?" – Scrooge dise – "Vade e compra el." "Riable!" – la xico esclama. "No, no," – Scrooge dise – "me es seria. Vade e compra el, e dise ce on ta trae el asi, afin me dona la adirije de la casa a cual on ta porta el. Reveni con la om, e me va dona un xiling a tu. Reveni con el en min ce sinco minutos, e me va dona du xilinges e un dui!" 45
Change language