par Charles Dickens - wikia.nocookie.net

Denova la fantasma pare regarda el.
"Si ave cualce person en la vila ci senti emosias causada par la mori de esta om," – Scrooge
dise, multe angusada – "mostra acel person a me, spirito, me prea a tu!"
La fantasma estende se roba oscur ante el per un momento, como un ala, e, retirante el, revela
un sala en lus de dia, do ave un madre e se enfantes.
La madre espeta algun, e con zelo ansios – car el pasea de asi a ala en la sala; salta a cada
sona; oserva a estra de la fenetra; regardeta la orolojo; atenta, ma futil, labora con se ago; e pote
apena tolera la voses de la enfantes en se juas.
Final, la bateta longa espetada es oiada. El freta a la porte, e encontra se sposo: un om de cual
se fas es preocupada e depresada, an si el es joven. El conteni aora un espresa notable, un spesie
de deleta seria cual vergonia el, e cual el luta per represa.
El senta se per la come cual es reservada per el a lado de la foco; e cuando la madre demanda
debil per se novas (cual no aveni asta pos un silente longa), el pare embarasada, no sabente
como responde.
"Bon novas?" – la madre dise – "o mal?" – per aida el.
"Mal." – el responde.
"Nos es intera ruinada?"
"No. Ave ancora espera, Caroline."
"Si acel om sede," – el dise, stonada – "ave espera! No cosa es ultra espera, si un tal miracle
ia aveni."
"El no pote sede aora." – se sposo dise – "El es mor."
Caroline es un creada jentil e pasiente, si on crede se fas; ma el es grasios en se spirito de oia
esta, e el dise tal, con manos juntada. El prea per pardona en la momento seguente, e regrete; ma
la emosia prima ia es en se cor.
"La fem partal ebra, cual me ia descrive a tu a la note pasada, ia dise a me, cuando me ia
atenta parla a acel om per pospone par un semana, un cosa cual me ia regarda como sola un
escusa per evita me, ma final el mostra se como la vera plen. El no ia es multe malada, ma
morinte, alora."
"A ci on va move nos deta?"
"Me no sabe. Ma ante acel tempo, nos va dispone la mone; e an si nos no va dispone el, nos
fortuna ta es vera mal si nos ta trova un creditor tan noncompatos en se seguor. A esta note, nos
pote dormi con cores lejera, Caroline!"
Si. An si los supresa la senti, se cores es plu lejera. La fases de la enfantes, silente e grupida a
sirca per oia acel cual los comprende tan poca, es plu joios; e la casa es plu felis par causa de la
mori de acel om! La un emosia causada par la aveni, cual la fantasma pote mostra a Scrooge, es
de plaser.
"Ta ce me vide alga teneria liada a un mori," – Scrooge dise – "o acel camera oscur, spirito,
de cual nos veni de parti, va es sempre presente a me."
La fantasma gida el tra stradas varios cual se pedes conose ja; e, en cuando los vade a longo,
Scrooge xerca asi e ala per trova se mesma, ma el es vidable en no loca. Los entra la casa de
Bob Cratchit, la povre – la abitada cual el ia visita a ante – e trova la madre e la enfantes
sentante sirca la foco.
Silente. Multe silente. La Cratchites peti e ruidos es tan nonmovente como scultas en un
angulo, e los senta con se regardas levada a Peter, ci ave un libro ante se. La madre e se fias es
ocupada en cose. Ma serta los es multe silente!
"'E El ia prende un enfante, e pone el a media de los.'"
Do Scrooge ia oia acel parolas? El no ia sonia los. Debe es ce la xico ia leje los a vose,
cuando el e la spirito ia traversa en la casa. Per ce el no continua?
La madre reposa se labora sur la table, e leva se mano a se fas.
"La color dole me oios." – el dise.
La color? A, Tim Pico, la povre!
"Aora, los es denova bon." – la sposa de Cratchit dise – "La lus de candela debili los, e me no
vole mostra oios debil a tu padre cuando el veni a casa, an per la mundo. La ora es probable
prosima."
40