par Charles Dickens - wikia.nocookie.net

plu streta, la casas fasante es mera fantasmas. Cisa, vidente la nube sombre desende per oscuri
tota cosas, on ta pensa ce la Natur abita multe prosima e fabrica bir en un cuantia grande.
La porte de la sala de contas de Scrooge es abrida afin el pote oserva se secretor, ci copia
leteras en un selula peti e despresante a ultra, un spesie de tance. Scrooge ave un foco multe
peti, ma la foco de la secretor es tan multe plu peti ce el aspeta como sola un carbon. Ma el no
pote repleni el, car Scrooge reteni la caxa de carbones en se sala propre; e sempre cuando la
secretor entra con la pala, la padron predise la nesesa de se despedi. Donce la secretor pone se
scarfa de lana blanca, e atenta tepidi se a la candela – e en esta taxe, car el no es un om forte
imajinos, el fali.
"Bon natal, tio! Ta ce Dio salva tu!" – un vose felis cria. Esta es la vose de la sobrino de
Scrooge, ci ia prosimi tan rapida a el ce esta es la indica prima persepable de se ariva.
"Ba!" – Scrooge dise – "Babela!"
Esta sobrino de Scrooge ia es ja tan multe caldida par pasea rapida en la nebla e jelada ce el
brilieta como un foco. Se fas es roja e bela; se oios sintili, e se respira fumi ancora.
"La natal es babela, tio?" – la sobrino de Scrooge dise – "Tu no intende acel, me es serta?"
"Me intende." – Scrooge dise – "Bon natal? Con cual motiva tu joia a natal? Per cual razona
tu es joios? Tu es bastante povre."
"Alora," – la sobrino replica felis – "con cual motiva tu no joia? Per cual razona tu es
malumoros? Tu es bastante rica."
Car a esta momento Scrooge no ia prepara un responde plu bon, el dise denova – "Ba!" – e
segue el con – "Babela."
"No es disputos, tio!" – la sobrino dise.
"Como me pote es otra," – la tio replica – "cuando me abita un tal mundo de foles como esta?
Bon natal? Vergonia de bon natal! Ce es la natal per tu, plu ce un tempo de paia faturas sin
mone? Un tempo de trova ce tu es plu vea par un anio, ma no plu rica par an un ora? Un tempo
per analise tu libros de contas e vide ce tu ia profita de an no un linia scriveda en un desduple
plen de menses? Si me ta pote reali me desira," – Scrooge dise indiniada – "cada fol ci vaga con
'Bon natal' sur se labios ta es bolida como un parte de se deser festos, e enterada con un palo de
ilex tra se cor. El merita!"
"Tio!" – la sobrino prea.
"Sobrino!" – la tio replica sever – "Onora la natal en tu modo propre, e permete me onora el
en me modo."
"Onora el?" – la sobrino de Scrooge repete – "Ma tu no onora el."
"Donce permete me iniora el." – Scrooge dise – "Ta ce tu benefica de el! Tu ia benefica
nunca de el a ante!"
"Ave multe cosas de cual me ta pote deriva ja un benefica, ma de cual me no ia profita, me
risca dise." – la sobrino replica – "La natal es un de estas. Ma me es serta ce, sempre cuando la
natal ia aveni – en ajunta a la respeta debeda a se nom e orijin santa, si cualce de se cualias pote
es un ajunta a esta – me ia considera el como un bon tempo; un tempo amante, pardonante,
carital, plasente; la tempo unica cual me conose en la calendario longa de la anio cuando, par
acorda comun, omes e femes pare abri libre se cores cluida, e considera la persones inferior de
los como vera ance pasajores a la tomba, e no como un otra raza de creadas ci ia emprende
viajas diferente. E donce, tio, an si la natal ia pone nunca un pico de oro o arjento en me pox,
me crede ce me ia benefica de el, e va benefica de el; e me dise: Ta ce Dio bondise el!"
La secretor en la tance ia aplaudi spontan. Persepinte direta ce esta no conveni, el tisa la foco,
e estingui per sempre la sintil frajil final.
"Si me oia denova un sona de tu," – Scrooge dise – "tu va onora tu natal par perde tu posto!
Tu parla multe potios, senior." – el ajunta, dirijente se a se sobrino – "Me es surprendeda ce tu
no deveni un membro de parlamento."
"No es coler, tio. Veni! Come con nos, doman."
Scrooge dise ce el ta prefere visita el en e... – si, vera el dise acel. El pronunsia la espresa
intera, e dise ce el ta prefere visita se sobrino en acel loca estrema.
"Ma per ce?" – la sobrino esclama – "Per ce?"
"Per ce tu ia sposi?" – Scrooge dise.
"Car me ia es enamada."
4