par Charles Dickens - wikia.nocookie.net

"La limpor ta veni solitar como la prima!" – la fem ci ia entra prima esclama – "La lavor de
vestes ta veni solitar como numero du; e la om de la funeror ta veni solitar como numero tre.
Vide, Joe Vea, ave asi un acaso! Pare ce tota de nos tre ia encontra asi sin intende!"
"Vos no ta pote encontra en un loca plu bon." – Joe Vea dise, prendente se pipa de se boca –
"Veni en la salon. Me ia dispone el a tu ante multe tempo, tu sabe; e la du otras no es stranjeres.
Espeta afin me clui la porte de la boteca. A! El grinse tan! Ave asi no peso de metal tan osidinte
como se xarnieres propre, me crede; e me es serta ce ave asi no osos tan vea como los de me. Ha
ha! Tota de nos conveni a nos ativias, nos conforma bon. Veni en la salon. Veni en la salon."
La salon es la spasio pos la scermo de trapos. La om vea tisa la foco, rastinte el con un bara
de scalera e, pos revive se lampa fumos (car es la note) par la tubo de se pipa, repone el en se
boca.
En cuando el fa esta, la fem ci ia parla ja lansa se faxo sur la solo, e senta se en un modo
ostentos sur un sejeta, crusante se codos sur se jenos, e regardante la du otras con un defia
corajos.
"Alora, ce es la problem? Ce, Seniora Dilber?" – la fem dise – "Cada person ave la direto de
cura se mesma. El ia fa sempre acel."
"Acel es vera, serta!" – la lavor dise – "Plu ce tota otra persones."
"Alora, bon, no sta fisante tu regarda como si tu teme, fem; ci va sabe? Nos furores no va
fura la bolsas la un de la otras, me suposa?"
"No, serta!" – Seniora Dilber e la om dise en junta – "Nos espera forte ce no."
"Alora, en acel caso" – la fem esclama – "sufisi! Ci sufri par la perde de un cuantia peti de
cosas como estas? No un mor, me suposa."
"No, serta." – Seniora Dilber dise, riente.
"Si el ia vole reteni los pos se mori, acel mal avar vea," – la fem continua – "per ce el no ia
condui natural en se vive? Si el ia condui natural, el ta ave algun per cura el cuando el es
colpada par la moria, en loca de fa solitar se respira final, reclinante ala, con sola se acompania
propre."
"On ia vosi nunca un parola plu vera." – Seniora Dilber dise – "Nos ia judi el seguente se
merita."
"Me desira ce la judi ta es alga plu forte," – la fem responde – "como el ta es, si me ta pote
trova cualce otra cosas per saisi – fida me. Abri acel faxo, Joe Vea, e lasa me sabe se valua.
Parla franca. Me no teme es la prima, e me no teme ce los vide el. Nos sabe vera bon ce nos ia
prende per nos mesmas, ante nos encontra asi, me crede. No es un peca. Abri la faxo, Joe."
Ma la bravia de se amis no permete esta; e la om en vestes negra palida, montante prima la
osa, produi sefuradas. Los no es multe. Un o du selos, un caxa de penetas, un duple de botones
de manga, e un brox de no valua grande – no plu ce estas. Los es individua esaminada e judida
par Joe Vea, ci creti sur la mur la preso cual el es disponada de dona per cada, e ajunta los a un
soma cuando el trova ce no plu cosas va veni.
"Ave ala tu conta," – Joe dise – "e me no ta dona ses plu peniges, an si on ta boli me per los.
Ci segue?"
Seniora Dilber segue. Telones e telas, alga vestes, du culieres de te – de arjento, de moda
pasada – un pinse de zucar, e alga botas. Se conta es declarada sur la mur en la mesma manera.
"Me dona sempre tro multe a la femes. Acel es me cualia debil, e me modo de ruina me." –
Joe Vea dise – "Ave ala tu conta. Si tu ta demanda per un plu penig, e ta permete negosia, me ta
repenti de es tan libriste, e me ta sutrae du xilinges e un dui."
"E deslia aora me faxo, Joe." – la fem prima dise.
Joe cade sur se jenos per pote abri el en un modo plu fasil e, pos desfisa un cuantia grande de
nodas, el tira a estra un rola grande e pesos de alga stofa oscur.
"Ce es esta?" – Joe dise – "Cortinas de leto?"
"Si!" – la fem replica, riente e apoiante se a ante sur se brasos crusada – "Cortinas de leto!"
"Tu no vole dise ce tu ia prende los, an la anelos, cuando el ia reclina ala?" – Joe dise.
"Si, me dise." – la fem responde – "Per ce no?"
"Tu ia es naseda per fa un monton de mone," – Joe dise – "e tu va susede serta."
38