par Charles Dickens - wikia.nocookie.net

A cada demanda nova cual es donada a el, esta sobrino fa un esplode nova de rie, e es tan
nonespresable titilada ce el es obligada de leva se de la sofa e piafa. Final, la sore ronda, cadente
en un state simil, esclama:
"Me ia trova la solve! Me sabe cual el es, Fred! Me sabe cual el es!"
"Cual el es?" – Fred cria.
"El es tu Tio Scro-o-o-o-oge!"
E esta es serta la solve. Amira es la senti universal, an si alga persones cexa ce la responde a
"Esce el es un urso?" ia debe es "si", si on considera ce un responde negativa ia sufisi per
deverje se pensas a via de Senior Scrooge, e si on suposa ce los ia ave an cualce tende en acel
dirije.
"El ia dona multe diverti a nos, me es serta," – Fred dise – "e nos ta es nongrasios si nos no ta
tosta se sania. Ave asi un vitro de vino spisida ja en nos manos a esta momento – e me dise: 'Tio
Scrooge!'"
"Bon! Tio Scrooge!" – los cria.
"Un bon natal e un bon anio nova a la vea, an en se carater!" – la sobrino de Scrooge dise –
"El no ia vole aseta acel de me, ma ta ce el ave el, an tal. A Tio Scrooge!"
Tio Scrooge ia deveni ja tan felis e lejera de cor ce el ta repaia la tosta se acompaniores
nonconsensa, e ta grasia los en un parla nonoiable, si la fantasma ta dona a el la tempo per esta.
Ma la sena intera pasa a via en la respira de la parola ultima parlada par se sobrino; e el e la
spirito es denova viajante.
Los vide multe, e vade distante, e visita multe casas, ma sempre con un bon resulta. La spirito
sta supra la letos de maladas, e los es felis; en paises stranjer, e los es prosima a se pais propre; a
lado de persones con vives difisil, e los es pasiente en se espera grandida; a povria, e el es rica.
En casas carital, ospitales e prisones, en cada refuja de miseria, do un person orgulos en se
autoria peti e tempora no ia fisa la porta per esclui la spirito, el lasa se bondise e dona a Scrooge
se instruis pratical.
La note es longa, si el es sola un note; ma Scrooge ave se dutas de esta, car plu ce un dia
festos de natal pare es compresada en la periodo de tempo cual los pasa en junta. Es ance strana
ce, an cuando Scrooge resta noncambiada en se forma esterna, la fantasma deveni plu vea, clar
plu vea. Scrooge ia oserva ja esta cambia, ma ia parla nunca de el, asta parti de un selebra de
enfantes a la sera de Res, cuando, regardante la spirito ci sta a se lado su la sielo, el persepi ce se
capeles es gris.
"Esce la vives de spiritos es tan corta?" – Scrooge demanda.
"Me vive sur esta globo es multe corta." – la fantasma responde – "El fini a esta sera."
"Esta sera?" – Scrooge esclama.
"A esta sera, a medianote. Escuta! La ora prosimi."
La campanas es sonante la tre cuatris pos des-un a acel momento.
"Pardona me si me fa un demanda nondiscrete," – Scrooge dise, regardante atendos la roba
de la spirito – "ma me vide alga cosa strana, cual no parteni a tu, e cual protende de su tu roba.
Esce el es un pede o un gara?"
"El es cisa un gara, si on judi par la poca carne cual el porta." – es la responde lamentos de la
spirito – "Regarda asi."
De la plias de se roba, el produi du enfantes: misera, compatable, asustante, fea, triste. Los
ajena a se pedes, e teni se a la esterna de se veste.
"O, umana! Regarda asi. Regarda, asi, asi a su!" – la fantasma esclama.
Los es un xico e un xica. Jala, magra, laserada, grimante, e lupin; ma ance prona en se umilia.
Do la jovenia refinada ta debe pleni se jenas e toca los con se colores la plu fresca, un mano vea
e plietada, como acel de senese, ia pinsi e torse ja los, e tira los a trinxas. Do anjeles ta pote
senta tronida, diablos asconde se e menasa par se regardas coler. No cambia, no degrada, no
perverti de umania, en cualce grado, tra tota la misterios de la mundo mervelios, ia crea
monstros con an un dui de la terori e asusta de estas.
34