par Charles Dickens - wikia.nocookie.net

Es aora la turno de la otras de rie a la idea ce el ia scude Scrooge. Ma car el ave un carater
eselente, e no multe ansia de sabe per ce los rie – tal ce los rie de el an ante el – el coraji los en
se festosia, e sirculi joios la botela.
Pos te, los fa alga musica, car los es un familia musical de capasia eselente cuando los canta
un gli o un ronda, me declara a tu – spesial Topper ci pote ronca basa como un bon baso,
inflante nunca la venas grande en se fronte, e no deveninte roja en se fas como resulta.
La sobrina de Scrooge toca bon la arpa, e aora el produi, entre otra melodias, un aira peti e
simple (vera trivial: on ta pote aprende sibila el en sola du minutos) cual ia es conoseda a la
enfante ci ia retrae Scrooge de se scola de abita, como la Fantasma de Natal Pasada ia fa el
recorda. Cuando esta melodia musical sona, tota la cosas cual acel fantasma ia mostra a el
reveni en se mente; el deveni sempre plu mol; e el crede ce, si el ia pote escuta el frecuente, ante
anios, cisa el ta pote cultiva la amables de la vive per se felisia propre par se manos propre, sin
debe usa la pala de tomba cual ia entera Jacob Marley.
Ma los no dedica la sera intera a musica. Pos un tempo, los fa la jua de multas – car es bon si
on condui a veses como enfantes, e nunca plu bon ce a natal, cuando se fundor potios ia es un
enfante se mesma. Para! On fa prima un jua de la sieca. Natural on fa acel. E me crede ce
Topper es vera sieca no plu ce me crede ce el ave oios en se botas. Me opina es ce un acorda
esiste entre el e la sobrino de Scrooge, e ce la Fantasma de Natal Presente sabe esta.
La modo en cual el xasa acel sore ronda en la covrepeto de dentela es un scandal contra la
credosia de la natur umana. Cadente la utiles de foco, voltante contra la sejas, xocante contra la
piano, sofocante se entre la cortinas – no importa do la sore vade, Topper vade ance! El sabe
sempre do la sore ronda es. El no vole catura cualce otra person. Si tu ia cade intendente contra
el (como alga de los fa), el ta fa un finje de atenta saisi tu – cual ta es un insulta a tu capasia de
comprende – e el ta vade direta ladal en dirije a la sore ronda. La sore esclama frecuente ce la
jua no es justa; e vera el no es.
Ma, cuando final el catura el, cuando, an con tota se xuxas de seda e se voletas rapida per
evita el, Topper trapi el en un angulo de do ave no posible de evade, alora se condui es la plu
odiable – car se finje ce el no reconose la sore, e se finje ce el nesesa palpa se moda de capeles,
e deveni plu serta de se identia par presa un anelo reconosable sur se dito, e un cadena
reconosables sirca se colo, es vil e monstrin! Me no duta ce la sore dona a Topper se opina de
esta cuando, con un otra person aora ocupante la posto de la sieca, los es tan multe privata la un
con la otra, pos la cortinas.
La sobrina de Scrooge no es un de los ci fa la jua de la sieca, ma el es comfortada par un seja
grande e un reposapede, en un angulo compata, do la fantasma e Scrooge sta prosima pos el. Ma
el partisipa en la jua de multas, e el jua amirable a "me ama me amada" con tota leteras de la
alfabeta. Simil, el es estrema bon a la jua de "como, cuando, do?" e, a la joia secreta de la
sobrino de Scrooge, el vinse fasil contra se sores – an si estas es ance xicas capas, como Topper
ta pote informa.
Ave cisa dudes persones ala, joven e vea, ma tota de los jua – como Scrooge ance, car, con la
interesa cual el ave en la avenis, el oblida plen ce se vose fa no sona en se oreas, e a veses el
revela se divina en un vose alga forte, e se divinas es ance intera coreta a multe veses; car la ago
la plu agu, la plu bon de Whitechapel, garantiada per no talia la filo par se oio, no es plu agu ce
Scrooge, an en la francia nonagu con cual el tende condui.
La fantasma es multe plaseda de trova el en esta umor, e ek regarda el con tan multe favore
ce Scrooge mendica como un xico per es permeteda de resta asta la parti de la visitores. Ma la
spirito dise ce esta no es posible.
"Ave asi un jua nova." – Scrooge dise – "Un dui de un ora, spirito, sola un!"
El es un jua nomida "si e no", do la sobrino de Scrooge debe pensa a un cosa, e la otras debe
descovre cual; el responde "si" o "no" a la demandas de los, seguente la caso. La ataca rapida de
demandas a cual el es esposada estrae de el ce el pensa a un animal, un animal vivente, un
animal alga nonamin, un animal savaje, un animal cual ronca e ruji a veses, e parla a veses, e
abita en London, e pasea en la stradas, e no es mostrada en esibis, e no es gidada par algun, e no
abita un zo, e es nunca matada en un mercato, e no es un cavalo, o un asino, o un bove fema, o
un bove mas, o un tigre, o un can, o un porco, o un gato, o un urso.
33