par Charles Dickens - wikia.nocookie.net

econose esta como la rie de se sobrino propre, e trova se en un sala luminada, seca e briliante,
do la spirito sta suriente a se lado e regarda acel mesma sobrino con amablia aprobante!
"Ha ha!" – la sobrino de Scrooge rie – "Ha ha ha!"
Si cisa tu conose, par alga acaso nonprobable, un om furnida con un rie plu bon ce la sobrino
de Scrooge, me pote dise sola esta: me ta gusta ance conose el. Presenta el a me, e me va cultiva
se acompania.
La mundo es ajustada en un modo justa, nobil e nonprejudos, car, an si maladia e tristia es
infetante, ave no cosa sur la tera cual es tan nonresistable comunicada como la ries e la bon
umor. Cuando la sobrino de Scrooge rie en esta modo – teninte se lados, rolante se testa, e
torsente se fas en contorses la plu estravagante – la sobrina de Scrooge par sposi rie tan zelos
como el. E se amis asemblada, con an no un poca de retarda, ruji en ries enerjios.
"Ha ha! Ha ha ha ha!"
"El ia dise ce la natal es babela, me jura!" – la sobrino de Scrooge esclama – "E el ia crede
esta!"
"Plu vergonia per el, Fred!" – la sobrina de Scrooge dise, indiniada. Ta ce on bondise acel
femes; los condui nunca a grado partal. Los es sempre seria.
La sobrina es multe bela: estrema bela, con un fas eselente con indentes de surie e un aspeta
surprendeda; un boca peti e matur cual pare es fada afin on besa el – como on fa, sin duta; tota
spesies de bon puntos peti sirca se menton cual fonde la un con la otras cuando el rie; e un duple
de oios plu joios ce on ta vide en la testa de cualce creada peti. En resoma, el es de un spesie
cual on ta nomi provocante, tu sabe; ma ance sasiante. O, perfeta sasiante.
"Acel vea es un om comica," – la sobrino dise – "acel es la vera: e el no es tan plasente como
el ta pote es. An tal, se ofendes porta se punis propre, e me ave no cosa per dise contra el."
"Me es serta ce el es multe rica, Fred." – la sobrina sujesta – "A la min, tu dise sempre acel
a me."
"Como acel importa, me cara?" – la sobrino dise – "Se ricia ave no valua per el. El no usa el
per fa bon. El no usa el per fa se es comfortos. El no ave la sasia de pensa – ha ha ha! – ce el va
usa el per benefica nos a un tempo futur."
"Me no pote tolera el." – la sobrina comenta. La sores de la sobrina de Scrooge, e tota la otra
femes, espresa la mesma opina.
"O, me pote!" – la sobrino dise – "Me compati el; me no ta pote es coler contra el, an si me ta
atenta. Ci sufri par se mal caprises? Se mesma, sempre. Vide, el pone en se testa ce el no gusta
nos, e el no va veni per come con nos. Ce es la resulta? El no perde plu ce un come magra."
"Vera, me crede ce el perde un come multe bon." – la sobrina interompe. Tota la otras dise la
mesma, e on debe aseta ce los es judores capas, car los es a fini de se come, e, con la deser sur la
table, los es grupida sirca la foco en la lus de lampas.
"Bon! Me es multe felis de oia acel," – la sobrino dise – "car me no fida multe esta manejores
joven de casa. Ce es tuopina, Topper?"
Clar, Topper ia pone ja se regarda sur un de la sores de la sobrina de Scrooge, car el responde
ce un om nonsposida es misera escluida, ci ave no direto de espresa un opina sur la tema. A
esta, la sore de la sobrina de Scrooge – la sore ronda con la covrepeto de dentela, no acel con la
rosas – roji.
"Dise plu, Fred." – la sobrina dise, batente se manos – "El fini nunca cual el comensa dise! El
es un om tan riable!"
La sobrino de Scrooge deleta se en un rie nova, e, car combate la infeta es nonposible – an si
la sore ronda atenta forte fa esta par ensofla vinagra bonodorinte – on segue la esemplo de la
sobrino sin eseta.
"Me ia intende dise sola" – la sobrino de Scrooge dise – "ce la resulta de la fato ce el no gusta
nos, e no condui joios con nos, es ce el perde alga momentos plasente cual no ta pote feri el. Me
es serta ce el perde acompaniores plu plasente ce el pote trova en se pensas propre, o en se ofisia
vea e mofos, o en se cameras polvos. Me intende dona la mesma oportun a el a cada anio, si el
gusta o no, car me compati el. Cisa el va protesta contra natal asta se mori, ma el no pote evita
boni se opina de el – me defia el – si el trova ce me visita el, en bon umor, a cada anio sin eseta,
e dise: 'Tio Scrooge, como vade?' Si esta fa no plu ce pone el en un umor do el vole dona
sincodes paundes a se secretor, acel es ja alga cosa. E me pensa ce me ia scude el ier."
32