par Charles Dickens - wikia.nocookie.net

Asi, denova, ave ombras sur la cortina enrolante de visitores ci asembla; e, ala, un grupo de
xicas bela, tota en capetas e botas de pelo, e tota parlante a la mesma tempo, brinca lejera a la
casa de alga visina prosima – do cada om nonsposida es nonfortunos si el vide los entra – esta
sorsores rusos – radiante!
Si tu ta judi par la cuantias de persones ci vade a asemblas amin, tu ta crede cisa ce nun resta
a casa per bonveni los cuando los ariva ala; ma, en loca, cada casa espeta visitores, e pila se
focos a un dui de la altia de la ximine.
Bondise el, la fantasma selebra tan multe! Tan multe el revela la largia de se peto, e abri se
palma spasios, e flota plu, versante, con un mano jeneros, se joia briliante e inosente sur tota
cosas cual el pote ateni! La ensendelampa se mesma, ci core ante los, ajuntante puntos de lus a
la strada negra, e ci es vestida per spende un sera en alga loca, esplode en un rie forte cuando la
spirito pasa, an si la ensendelampa sabe poca ce el es acompaniada par no plu ce la natal
personida!
E aora, sin an un parola de averti par la fantasma, los sta sur un stepe sombre e vacua, do
masas monstrin de petra ru es sperdeda, como si esta es la semetero de jigantes; e acua estende
se a cualce locas cual el eleje – o ta fa esta si el no ta es prisonida par la jelada; e no cosa crese
estra mos e ulex, e erba spesa e alta. Basa en la ueste, la sol ia lasa un raio de roja focin cual
arde feros supra la deserto per un momento, como un oio malumoros, de cual se suprasiles
sempre plu basinte, e ancora plu, deveni perdeda en la sombria densa de un note la plu oscur.
"Ce es esta loca?" – Scrooge demanda.
"Un loca do escavores abita, ci labora en la ventre de la tera." – la spirito responde. – "Ma los
conose me. Vide!"
Un lus brilia de la fenetra de un cabana, e los avansa rapida en se dirije. Pos pasa tra la mur
de fango e petra, los trova un grupo felis asemblada sirca la brilieta de un foco: un om e fem
multe vea, con se enfantes e la enfantes de se enfantes, e un plu jenera ultra acel, tota decorada
en un modo vivos en se vestes de festa. La om vea, en un vose cual suprapasa rara la ulula de la
venta sur la deserto steril, fa un canta de natal per los – el ia es ja un canta multe vea cuando el
ia es un xico – e, de tempo a tempo, tota de los junta se en la refren. Sempre cuando los leva se
voses, la vose de la om vea deveni multe joios e forte; e sempre cuando los para, se enerjia
diminui denova.
La spirito no permane asi, ma comanda ce Scrooge teni se roba, e, continuante supra la stepe,
freta – a do? No a la mar? A la mar. A la teror de Scrooge, regardante a retro, el vide pos los la
fini de la tera, un cadena asustante de rocas; e se oreas es sordida par la tona de acua cual rola e
ruji, e coleri entre la cavones temable cual el ia erode ja, e atenta feros sumina la tera.
Construida sur un resife triste de rocas su la mar, a sirca un lega de la costa, rocas sur cual la
acuas frica e crase tra tota la anio savaje, un faro solitar sta. Montones grande de algas adere a
se funda, e avias de tempesta – enfantes de la venta, on ta suposa, como algas es de la acua –
leva e cade sirca el, como la ondas supra cual los lisca.
Ma, an asi, du omes ci manteni la lus ia fa un foco cual, tra la buco streta en la mur de petra
spesa, lansa un raio de brilia sur la mar asustante. Juntante se manos dur supra la table ru a cual
los senta, los desira un bon natal la un a la otra, bevinte de se balde de rum diluida; e un de los –
ance la plu vea, con se fas tan danada e sicatrisida par la clima dur como on imajina la figur de
proa de un barcon vea – inisia un canta cual en se mesma es tan forte como un venton.
Denova la fantasma freta plu, supra la mar de ondas negra – plu, plu – asta cuando, distante
de cualce costa, como el dise a Scrooge, los desende sur un barcon. Los sta a lado de la timonor
a la rota, la vijilor en la proa, la ofisiores ci fa la vijila; figures oscur e fantasmin en se locas
varios; ma cadun entre los zumbi un melodia de natal, o pensa de natal, o parla en un vose basa
a se acompanior de alga dia de natal pasada, con esperas asosiada de reveni a casa. E cadun sur
la barcon, veliada o dorminte, bon o mal, ia espresa se opina de un otra en un modo plu amin a
acel dia ce a cualce dia en la anio; e ia comparti la festosia de la dia a alga grado; e ia recorda la
persones distante ci el cura, e ia sabe ce los deleta en recorda el.
Es un surprende grande a Scrooge, ci escuta la jemi de la venta, e pensa ce el esperia un stona
temos en se progresa tra la oscuria abandonada supra un profonda nonconoseda, conteninte
secretas tan nonpenetrable como la moria – es un surprende grande a Scrooge, ci es ocupada en
esta modo, cuando el oia un rie zelos. Es un surprende multe plu grande a Scrooge cuando el
31