par Charles Dickens - wikia.nocookie.net

"Me vide un seja vacua" – la fantasma responde – "en la angulo de la ximineria povre, e un
muleta sin posesor, conservada con cura. Si esta ombras resta noncambiada par la futur, la
enfante va mori."
"No, no." – Scrooge dise – "O, no, spirito amin! Dise ce el va es salvada."
"Si esta ombras resta noncambiada par la futur, no otra de me raza" – la fantasma replica –
"va trova el asi. E donce? Si el prefere mori, ta ce el fa, e redui la suprapasa de popla."
Scrooge basi se testa a oia la sita de se parolas propre par la spirito, e es vinseda par repenti e
tristia.
"Umana," – la fantasma dise – "si tu es umana en tu cor, e no petrin, ta ce tu reserva acel
linguaje malvolente asta cuando tu ia descovre la natur e la loca de la suprapasa. Esce tu ta
deside ci va vive, ci va mori? Pote es ce, en la oios de Dio, tu ave min valua e min merita de
vive ce miliones simil a la enfante de esta om povre. Bon Dio! On oia la inseto sur la folia
declara ce ave tro multe viventes entre se frates fama en la polvo!"
Scrooge inclina ante la reproxa de la fantasma e dirije se regarda a la tera en un modo
tremante. Ma el leva el rapida cuando el oia se nom propre.
"Senior Scrooge!" – Bob dise – "Me ta tosta Senior Scrooge, la fundor de la banceta!"
"La fundor de la banceta, apena!" – Seniora Cratchit esclama, rojinte – "Me vole ce el ta es
asi. Me ta servi un banceta de me opinas a el, e me espera ce el ta ave un bon apetito per los."
"Me cara," – Bob dise – "la enfantes! La dia de natal!"
"Natural a la dia de natal, me es serta," – el dise – "on tosta la sania de un om tan odiable,
avar, dur e nonsentos como Senior Scrooge. Tu sabe ce el es tal, Robert! Nun sabe esta en un
modo plu clar ce tu, me povre!"
"Me cara," – es la responde jentil de Bob – "la dia de natal."
"Me va tosta se sania per la benefica de tu e de la dia," – Seniora Cratchit dise – "ma no de el.
Ta ce el vive longa! Un natal joios e un anio felis! El va es multe joios e multe felis, me ave no
duta!"
La enfantes bevi la tosta pos el. Esta es la prima de se prosedes cual ave no zelo. Tim Pico
bevi ultima de tota, ma el no gusta an un gota de el. Scrooge es la ogro de la familia. La refere a
se nom fa un ombra oscur desende sur la selebra, cual on susede desapare sola pos sinco
minutos longa.
Pos la pasa de la ombra, los es plu joios a des veses ce a ante, lejerida sola car los ia fini trata
Scrooge la Malvolente. Bob Cratchit informa los ce el previde un posto per Senioreto Peter cual,
si otenida, va trae a la casa no min ce sinco xilinges e un dui per semana. La du Cratchites joven
rie enorme a la idea ce Peter va deveni un om de comersia; e Peter se mesma regarda pensos la
foco de entre se colares, como si el discute con se cual investis el va favore spesial cuando el
comensa reseta acel revenu confondente.
Alora Martha, ci es un aprendor povre a un xapor, informa los de la spesie de labora cual el
debe fa, e tra cuanto oras el labora en segue, e como el intende doman resta en se leto a la
matina per un bon reposa longa, car doman es un festa cual el va spende a casa. El ajunta ce el
ia vide un contesa e un baron ante alga dias, e ce la baron "ia ave un altia simil a Peter", a cual
Peter leva tan alta se colares ce tu no ta pote vide se testa si tu ta es presente.
Tra tota esta tempo, la castanias e la carafa sirculi en sirculos; e pos un tempo los oia un
canta, sur un enfante perdeda ci viaja en la neva, de Tim Pico, ci ave un vose peti e triste, e ci
canta el en un modo vera multe bon.
Ave no cualia de la sosia alta en esta. Los no es un familia bela; los no es bon vestida; se
sapatos no es an partal secur contra acua; se vestes es nonsufisinte; e Peter conose posible, e
vera an probable, la interna de un impenieria. Ma los es felis, grasios, plaseda la un par la otras,
e contente con la tempo; e cuando los pali, e aspeta an plu felis en la sperdes briliante de la torxa
de la spirito partinte, Scrooge fisa se regarda a los, e spesial a Tim Pico, asta la fini.
A esta tempo, deveni ja oscur, e neva alga forte; e, an cuando Scrooge e la spirito vade longo
la stradas, la brilia de la focos es mervelios, rujinte en cosinas, salones e salas de tota spesies.
Asi, la incandese dansante mostra preparas per un come peti e comfortos, con platos calda
cual on forni penetrante ante la foco, e cortinas oscur roja, preparada per retira contra fria e
oscuria. Ala, tota la enfantes de la casa sorti corente en la neva per encontra se sores e frates
sposida, se cusines, tios e tias, e per es la prima ci saluta los.
30