par Charles Dickens - wikia.nocookie.net

Strofe 1
La fantasma de Marley
Marley es mor, per comensa. Ave vera no duta de esta. La arcivo de se entera es ja suscriveda
par la eglesor, la arcivor, la funeror, e la lamentor xef. Scrooge ia suscrive el, e la nom de
Scrooge es bon en la mercato per tota cosas sur cual el eleje scrive el. Marley Vea es tan mor
como un clo de porte.
Ma nota! Me no vole dise ce me sabe, par me conoses propre, en cual modo un clo de porte
es spesial mor. Me mesma, me ta es disposada de regarda un clo de caxon funeral como la ben
la plu mor en la comersia de ferores. Ma la compara conteni la sajia de nos asendentes, e ta ce
me manos nonsanta no disturba el, o nos pais va es ruinada. Donce tu va permete me repete,
asentuante, ce Marley es tan mor como un clo de porte.
Esce Scrooge sabe ce el es mor? Natural. Como ta pote es diferente? Scrooge e el ia es
asosiores per me-no-sabe-cuanto anios. Scrooge es se esecutor unica, se dirijor unica, se
asiniada unica, la eritor unica de se propria restante, se ami unica, e lamentor unica. E an
Scrooge no ia es tan estrema angusada par la aveni triste ce el no ia pote esele como comersior
an en la dia de la funera, onorante esta en un modo seria par un profita nondutada.
La refere a la funera de Marley fa me reveni a la punto de do me ia comensa. Ave no duta ce
Marley es mor. On nesesa comprende clar esta, o no mervelia pote resulta de la nara cual me va
reconta. Si nos no ta es completa convinseda ce la padre de Hamlet ia mori ante la comensa de
la teatral, alora cuando el fa un pasea a note, en un venta este, sur se murones propre, esta ta ave
no cualia plu notable ce si cualce otra senior en se anios media ta sorti noncauta pos noti en un
loca ventos – per esemplo, la Semetero de San Paulo – simple per stona la mente debil de se fio.
Scrooge ia despinti nunca la nom de Marley Vea. El sta ala, pos anios, supra la porte de la
boteca: Scrooge e Marley. La compania es conoseda como Scrooge e Marley. Persones nova a
la compania clama Scrooge a veses Scrooge, e a veses Marley, ma el responde a ambos nomes.
Tota es egal a el.
O! Ma el es un comersior con manos selida, esta Scrooge! Un pecor vea ci crase, saisi, raspa,
teni e anela! Dur e agu como petra focos, de cual un aser ia colpa nunca un foco jeneros;
secreta, e autonom, e solitar como un ostra. La fria en el jela se fas vea, pinsi se nas puntida,
plieta se jena, rijidi se pasea; roji se oios, blui se labios magra; e parla penetrante en se vose
grinsente. Un grisia jelin es sur se testa, e sur se suprasiles, e se mento sever. El porta sempre se
temperatur propre con el; el jela se ofisia a mediaestate, e no dejela el par an un grado a natal.
Caldia e fria esterna ave poca influe a Scrooge. No caldia pote caldi el, no clima invernin
pote fri el. No venta cual sofla es plu amarga ce el, no neva cadente es plu zelos en se intende,
no pluve colpante es min abrida per mendicas. Climas mal no sabe como trata el. La avenis la
plu forte de pluve, e neva, e graniza, e neva dejelante pote vanta de se vantaje supra el en sola
un relata: los ofre frecuente se en un manera jeneros, e Scrooge fa nunca esta.
Nunca la persones para el en la strada per dise, con aspeta joios – "Scrooge, me cara, como
vade? Cuando tu va veni per vide me?" No mendicores prea el furni un moneta, no enfantes
demanda el cual es la ora, no om o fem ia xerca de Scrooge la via a alga destina, a an un ves en
tota se vive. An la canes de la siecas pare conose el; e cuando los vide el prosimi, los tira se
posesores su arcos de portes e en stradetas; e alora los scude se codas como si los dise – "Oios
mancante es plu bon ce oios mal, me padron sieca!"
Ma acel no conserna Scrooge! Acel es la cosa cual el gusta vera. Se pasos ladal longo la vias
folida de la vive, e se avertis ce tota simpati umana ta resta distante – estas, per Scrooge, es de
un spesie cual la sajas nomi "fresca".
A un ves – a la sera de natal, entre tota la bon dias en la anio – Scrooge Vea senta ocupada en
se sala de contas. La clima es fria, sombre, dolos – neblos, ance – e el oia la persones en la
stradeta esterna ci vade con respira ruidos de asi a ala, batente se manos sur se petos, e piafante
se pedes sur la petras de la paseria per caldi los. La orolojos de la urbe veni de sona la ora tre,
ma es ja vera oscur – ia ave lus clar a no parte de la dia – e on ensende candelas en la fenetras
de la ofisias visina, como frotas sanguin roja sur la aira palpable brun. La nebla entra en
deluvias a cada fesur e buco de clave, e es tan densa a estra ce, an si la stradeta es de la spesie la
3