par Charles Dickens - wikia.nocookie.net

Tan multe ativia segue ce on ta pote crede ce un ganso es la plu rara de tota avias, un
fenomeno plumos a cual un sinie negra ta pare como un cosa normal – e vera un ganso es de un
tal spesie en acel casa.
Seniora Cratchit fa ce la salsa de carne (ja preparada en un caserol) deveni sisante calda;
Senioreto Peter maxa la patatas con enerjia noncredable; Senioreta Belinda dulsi la salsa de
poma; Martha despolvi la platos calda; Bob prende Tim Pico a se lado en un angulo pico a la
table; la du Cratchites joven pone sejas per cadun, sin oblida se mesmas, e comensante a se
postos de garda, los pleni se bocas con culieres, per impedi se de xilia per ganso ante la ariva de
se turno de servi.
Final on pone la platos sur la table, e dise la prea de grasias. Esta es segueda par un pausa sin
respira cuando Seniora Cratchit, regardante lenta longo la cotel de carne, prepara puxa el en la
peto; ma cuando el fa esta, e cuando la jeta de pleninte longa espetada apare, un murmura de
deleta leva se sirca tota la table, e an Tim Pico, stimulada par la du Cratchites joven, bate la
table con la manico de se cotel e cria debil – "U-ra!"
Ave nunca un tal ganso. Bob dise ce el crede ce on ia coce nunca un tal ganso. Se teneria e
sabor, se grandia e baratia, es la temas de amira universal. Durada par salsa de poma e patatas
maxada, el es un come sufisinte per tota la familia; vera, como Seniora Cratchit dise con deleta
grande (studiante un atom peti de un oso sur la plato), los no ia come tota de el, an a la fini! Ma
cadun ia come sasiante, e spesial la Cratchites la plu joven es saturada en salvia en onion asta se
suprasiles!
Ma aora, cuando la platos es cambiada par Senioreta Belinda, Seniora Cratchit sorti solitar de
la sala – tro ansios per tolera atestores – per prende la deser e porta el a interna.
Imajina si el no ta es sufisinte bolida! Imajina si el ta rompe cuando on estrae el! Imajina si
algun ia trepa a traversa de la mur de la patio retro e fura el, cuando los ia es divertinte se con la
ganso – un suposa a cual la du Cratchites joven deveni furios! On imajina terores de tota
spesies.
U! Un cuantia grande de vapor! La deser sorti de la caldera. Un odor como un dia de lava!
Acel es fada par la tela. Un odor como un restorante e un boteca de tartes, la un a lado de la otra,
con un laveria a lado de los! Acel es fada par la deser! Pos un dui de un minuto, Seniora
Cratchit entra – roja, ma con un surie orgulos – con la deser como un bal de canon con
manxetas, tan dur e firma, ardente en un dessesi de un otigalon de coniac ensendeda, e decorada
con ilex de natal plantada en se culmine.
O, un deser mervelios! Bob Cratchit dise, e an calma, ce el regarda el como la susede la plu
grande cual Seniora Cratchit ia ateni de pos se sposi. Seniora Cratchit dise ce, con la ansia aora
prendeda de se mente, el confesa ce el ia ave alga dutas sur la cuantia de farina. Cadun ave alga
cosa per dise sur la deser, ma nun dise o pensa ce el es en cualce modo un deser peti per un
familia grande. Ta es simple erese si on ta fa acel. Cualce Cratchit ta roji a an un indiceta de un
tal cosa.
Final la come es completida, la table es reordinada, la ximineria es scopida, e la foco es
reviveda. Pos cuando on ia proba la misca en la carafa e ia judi el es perfeta, on pone pomas e
oranias sur la table, e un plenipala de castanias sur la foco. Alora tota la familia Cratchit
asembla sirca la ximineria, en un forma cual Bob Cratchit nomi un sirculo, intendente un dui de
acel; e a la codo de Bob Cratchit ave un esibi de la vitros de la familia: du vitros de bevi, e un
copa de crema sin manico.
An tal, estas porta la licuida calda de la carafa tan bon como copas de oro ta fa; e Bob
distribui el con oios radiante, en cuando la castanias sur la foco balbuta e craci ruidos. Alora
Bob fa un tosta:
"Un bon natal a tota de nos, me caras. Ta ce Dio bondise nos!"
E tota la familia fa la eco de esta.
"Ta ce Dio bondise nos, an cadun!" – Tim Pico dise, la ultima de tota.
El senta multe prosima a la lado de se padre sur se sejeta peti. Bob teni se mano atrofiada peti
en se propre, como si el ama la enfante e desira reteni el a se lado, e teme ce cisa se fio va es
prendeda de el.
"Spirito," – Scrooge dise, con un interesa cual el ia senti nunca a ante – "dise a me si Tim
Pico va vive."
29