par Charles Dickens - wikia.nocookie.net

crostida e manxada par zucar fondeda ce la regardores la plu fria ave un senti de desmaia e, a
pos, de nausea.
E no es car la figas es umida e pulpos, o car la prunas franses roji en asidia modesta de se
caxas multe ornos, o car tota es bon comable e porta se vestes de natal. Ma tota la clientes es tan
fretos e tan zelos ante la promete esperos de la dia ce los luta la un contra la otra a la porte,
colpante savaje se sestos de vim, e lasa se compradas sur la table de vende, e reveni corente per
retrae los, e fa sentos de eras simil en la umor la plu bon posible, an cuando la comedor e se
persones es tan franca e fresca ce la cores de cuoro briliante con cual los fisa la retros de se
faldones ta pote es se cores propre, portada a estra per la esamina jeneral e per nuri la corvos a
natal si estas desira.
Ma pronto la pinaculos clama tota bon persones a eglesa o egleseta, e los veni a via, pasante
tra la stradas como un manada en se vestes la plu bon, e con se fases la plu felis. E, a la mesma
tempo, persones noncontable emerji de desduples de stradetas, ruetas, e vias sin nom, portante
se comes a la fornores.
La vide de esta selebrores povre pare interesa vera multe la spirito, car el sta, con Scrooge a
se lado, su la arco de porte de un fornor e, levante la covrentes cuando la portores pasa, sperde
insenso de se torxa sur se comes. E esta es un torxa de un spesie multe noncomun, car a un o du
veses, cuando ave parolas coler entre alga portores de come ci ia xoca la un contra la otra, el
versa alga gotas de acua sur los de el, e se bon umor es direta restorada – car los dise ce disputas
a la dia de natal es vergonios. E es vera tal! Par la bondise de Dio, es vera tal!
Pos alga tempo la campanas sesa, e la fornores clui se botecas; e ave ancora un sujesta amin
de tota esta comes, e de la progresa de se coce, en la manxa moiada e dejelada supra la forno de
cada fornor, do la paseria fumi como si se petras es ance cocente se.
"Esce ave un sabor spesial en esta cual tu sperde de tu torxa?" – Scrooge demanda.
"Si. Me propre."
"El ta aplica a cualce spesie de come a esta dia?" – Scrooge demanda.
"A cualce cual es amable donada, e la plu a la comes povre."
"Per ce la plu a la povres?" – Scrooge demanda.
"Car los nesesa el la plu."
"Spirito," – Scrooge dise, pos un momento de pensa – "me es stonada ce tu, entre tota la
esentes en la multe mundos sirca nos, ta desira restrinje la oportunes de esta persones per plaser
inosente."
"Me?" – la spirito cria.
"Tu ta priva los de se medio de come a cada dia sete, cual es comun la dia unica a cual on
pote dise ce los come an poca." – Scrooge dise – "Es vera, no?"
"Me?" – la Spirito cria.
"Tu vole clui esta locas a la dia sete, no?" – Scrooge dise – "E esta dona la mesma resulta."
"Me vole?" – la spirito esclama.
"Pardona me si me era. On ia fa esta su tu nom, o a la min su la nom de tu familia." –
Scrooge dise.
"Ave alga persones sur esta tera do tu abita" – la spirito responde – "ci declara ce los conose
nos, e ci fa su nos nom se atas de pasion, orgulo, malvole, odia, invia, prejudi e egosia, ci es tan
stranjer a nos e a tota de nos relatadas como si los ia vive nunca. Recorda esta, e culpa los, no
nos, per la atas cual los fa."
Scrooge promete ce el va fa esta; e los continua, nonvidable, como los ia es a ante, en la
suburbes de la vila. Un cualia notable de la fantasma (cual Scrooge ia oserva ja a la fornor) es
ce, an con se grandia jigante, el pote ajusta se a cada loca en un modo fasil, e ce el sta su un teto
basa en un modo egal tan refinada e simil a un creada supranatural como es posible ce el ta es
capas de fa en cualce salon alta.
E cisa par causa de la plaser cual la bon spiritio ave en mostra esta potia de se, o, si no, par
causa de se natur propre amable, jeneros e zelos, el es gidada direta a la casa de la secretor de
Scrooge – car el vade ala, e prende Scrooge con el, teninte se a se roba; e, sur la grado de la
porte, la spirito surie, e para per bondise la abitada de Bob Cratchit par un sperde de se torxa.
Imajina acel! En cada semana, Bob se mesma ave sola des-sinco "bobes", como on nomi la
27