par Charles Dickens - wikia.nocookie.net

"Tu ia pasea nunca con la membros plu joven de me familia? Me intende (car me es multe
joven) me frates plu vea ci ia nase en esta anios plu tarde." – la fantasma continua.
"Me no crede ce me ia fa." – Scrooge dise. – "Me regrete ce no. Tu ia ave multe frates,
spirito?"
"Plu ce des-oto sento." – la fantasma dise.
"Un familia enorme si on debe nuri los!" – Scrooge murmura.
La Fantasma de Natal Presente leva se.
"Spirito," – Scrooge dise sedente – "gida me do tu vole. Me ia es obligada de sorti a la note
pasada, e me ia aprende un leson cual opera aora. A esta note, si tu ave alga cosa per ensenia a
me, ta ce el benefica me."
"Toca me roba!"
Scrooge segue la comanda, e teni fisada el.
Ilex, viscio, bacas roja, edera, pavos, gansos, avias, ceso, carne, porcetas, salsixes, ostras,
tartetas, deseres, frutas e ponxe – tota desapare direta. La sala, la foco, la lus roja, e la ora de
note fa simil, e los sta en la stradas de la site a la matina de natal, do (car la clima es sever) la
persones fa un musica de un spesie ru, ma enerjios e no nonplasente, en raspa la neva de la
paseria ante se abitadas, e de la tetos de se casas, de do el desende plufinte a la via a su, en un
deleta fol per la xicos ci vide el divide se en tempestas peti artifisial.
La frontes de la casas aspeta alga negra, e la fenetras an plu negra, en contrasta con la telon
lisa de neva blanca sur la tetos, e con la neva plu susia sur la tera. Esta deponeda ultima es ja
aradida en sulcas profonda par la rotas pesos de caros e vagones, sulcas cual crusa e recrusa la
un la otra a sentos de veses do la stradas grande rami a via, e cual fa canales complicada, difisil
per segue en la fango densa jala e la acua jelin.
La sielo es sombre, e la stradas la plu corta es sofocada par un nebleta oscur, partal dejelada,
partal jelada, de cual se particulas la plu pesos desende en un pluveta de atomes carbonos, como
si tota la ximines en Britan ia ensende se par acorda comun, e arde aora per sasia se cores cara.
Ave no cosa multe felis en la clima o la vila, e, an tal, on ave jeneral un umor de felisia cual la
aira la plu clar de estate e la sol la plu briliante de estate ta labora futil per rari.
Car la persones ci labora con se palas sur la tetos es amin e plen de joia; los esclama la un a la
otra de la parapetos, e intercambia de tempo a tempo un bal de neva bromos – un misil de un
umor vera plu bon ce multe bromas parolos – riente zelos si el colpa se gol, e no min zelos si el
vaga.
Un dui de la botecas de la carnores de avia es ancora abrida, e los de la frutores es radiante en
se gloria. Ave sestos grande, ronda e obesa de castanias, formida como la jacetas de seniores
vea e joios, reposante laxe a la portes e cadente a estra en la strada en se ricia malada. Ave
oniones de Espania, con fases roja brun e taies larga, briliante en la obesia de se crese como
monces espaniol e, en ruses promiscua, giniante de se scafales a la xicas ci pasa e fa regardetas
modesta a la viscio pendente.
Ave peras e pomas, alta grupida en piramides radiante; ave colies de uvas cual la botecores,
con bonvole, ia suspende de oncas fasil vidable, afin la bocas de la persones pote salivi sin costa
cuando los pasa; ave montones de nozetas, muscin e brun, cual recorda par se bon odor paseas
antica en la bosces, e pantoflis plasente tra folias secida tan profonda como la talos; ave pomas
de Norfolk, truncin e oscur, relevante la jala de la oranias e limones, e, par la compatia intensa
de se corpos jusos, preante e mendicante forte ce on porta los a casa en sacos de paper e come
los per deser.
An la pexes oro e arjento, esibida en un bol entre esta frutas desirable, an si los es membros
de un raza stupida de sangue staniante, pare sabe ce alga cosa aveni; e cadun de la pexes vade
con boca abrida, sempre sirculinte sirca se mundo peti con stimula lenta e nonpasionos.
La comedores! O, la comedores! Se botecas es cuasi cluida, con cisa du covrefenetras fisada,
o un; ma tra acel bucos, on videta cosas tan bela! Esta no es sola car la balansa cadente sur la
table fa un sona joios, o car la cordeta es tan enerjios separada de se rola, o car on scude la jares
a supra e a su como trucos de jogla, o an car la odores miscada de te e cafe es tan grasiada par la
nas, o an car la uvas seca es tan abundante e estracomun, la amandas es tan estrema blanca, la
bastetas de canela es tan longa e reta, la otra spises es tan deletos, e la frutas confetida es tan
26