par Charles Dickens - wikia.nocookie.net

"Me ia es un xico." – el dise nonpasiente.
"Tu senti propre informa tu ce tu no ia es acel cual tu es aora." – el replica – "Me ia resta la
mesma. La cosa cual ia promete felisia cuando nos ia es unida de cor es plen de miseria per nos
ci es aora du. Me no va dise como frecuente e intensa me ia pensa de esta. Sufisi ce me ia pensa
de el, e pote libri tu."
"Esce me ia xerca es librida a ante?"
"Par parolas, no. Nunca."
"Donce en cual manera?"
"Par un natur cambiada; par un spirito alterada; par un otra atmosfera de vive, con un otra
espera como se gol grande. Par tota cual ia dona alga merita o valua a me ama, en tu opina. Si
esta ia aveni nunca entre nos," – la xica dise, regardante el en un modo jentil ma firma – "dise a
me: esce tu ta xerca me e atenta aora gania me? A, no!"
La om pare sede a la justia de esta suposa, an contra se desiras. Ma el dise con luta – "Tu
crede ce no."
"Me ta es felis de crede diferente si me ta pote." – el responde – "Dio sabe! Cuandome ia
aprende un vera de esta spesie, me sabe ce el es multe forte e nonresistable. Ma si tu ta es libre,
oji, doman, ier, esce an me pote crede ce tu ta eleje un xica sin dote – tu, ci judi tota cosas per
profita an en tu confidas con esta xica? O, si, elejente el, tu ta iniora tan multe per un momento
tu prinsipe gidante per fa esta, esce me no sabe ce tu repenti e regrete ta segue serta? Me sabe
esta; e me libri tu, con cor plen, per la ama de la person ci tu ia es a un ves pasada."
La om ia es a punto de parla; ma, con se testa torseda a via de el, el recomensa.
"Es posible – la memoria de la pasada fa me espera partal ce es probable – ce tu va sufri de
esta. Un tempo multe multe corta va pasa, e tu va refusa felis la recorda de el como un sonia
nonprofitos, pos cual tu velia ia es un bon aveni. Ta ce tu es contente en la vive cual tu ia eleje!"
La xica sorti, e los parti.
"Spirito!" – Scrooge dise – "Mostra no plu! Gida me a me casa. Per ce tu deleta de tortura
me?"
"Ancora un plu ombra!" – la fantasma esclama.
"No plu!" – Scrooge cria – "No plu. Me no vole vide el. Mostra no plu!"
Ma la fantasma nonsedente saisi el par ambos de se brasos, e obliga el oserva la aveni cual
segue.
Los es en un otra sena e loca: un sala, no multe grande o bela, ma plen de comforta. Prosima
a la foco de inverno, un xica bela joven senta, tan simil a la presedente ce Scrooge crede ce el es
la mesma – asta cuando el vide acel, aora un sposa atraos e dinios, ci senta fasante se fia. La
ruido en esta sala es intera caosos, car ave ala plu enfantes ce Scrooge pote conta en se state de
mente ajitada; e, no como la manada de boves selebrada en la poesia, los no es cuatrodes
enfantes conduinte como un, ma cada enfante condui como cuatrodes.
La resultas es noncredable tumultos; ma nun pare disturbada; par contrasta, la madre e fia rie
zelos, e gusta multe la ruido; e la fia, ci comensa pronto misca se en la sportes, es sacada par la
atacores joven en un modo vera sin repenti. Ce me no ta dona per es un de los! Ma me ta pote
nunca es tan noncortes, no, no! Me no ta crase acel capeles trensada e destrui se posa, an per
tota la mundo; e consernante la sapato peti e valuos, me no ta pinsi el a via – ta ce Dio bondise
me! – an per salva me vive.
Regardante como los mesura la taie de la fia en diverti – e los fa esta, la projenia joven e
corajos – me no ta pote fa esta; me ta espeta ce me braso va estende sirca el per un puni, e va
deveni nunca denova reta. E, an tal, me ta gusta cara, me confesa, toca se labios; fa demandas a
el, afin el ta abri los; regarda la siles de se oios dirijeda a su, e roji nunca; libri ondas de capeles,
de cual an un sentimetre ta es un recordante de preso noncalculable: en resoma, me ta gusta, me
confesa an, ave la libria la plu lejera de un enfante, ma es ancora un om sufisinte capas de
reconose la valua de esta.
Ma aora, on oia un bateta a la porte, e un tal freta segue direta ce la fia, con fas riente e vestes
sacada, es portada en acel dirije como la sentra de un grupo roja e ruidos, arivante a tempo per
saluta la padre, ci reveni a casa, acompaniada par un om cargada par juetas e donadas de natal.
Alora, la crias e la lutas, e la ataca cual on fa contra la portor noncapas de defende se! La
trepa de el par sejas en loca de scalas per esplora se poxes, saca el per se pacetas de paper brun,
21