par Charles Dickens - wikia.nocookie.net

Cuando la orolojo sona la ora des-un, esta balo de casa fini. Senior e Seniora Fezziwig sta a
se postos, un a cada lado de la porte, e, presante manos con cada person individua cuando el
sorti, desira a el un bon natal. Pos cuando cadun ia sorti, estra la du aprendores, los fa la mesma
a estas; e en esta modo la voses felis desapare lenta, e la xicos es lasada a se letos, cual es su un
table en la sala retro de la boteca.
Tra tota de esta tempo, Scrooge ia condui como un om demente. Se cor e spirito ia es en la
sena, e con se mesma plu joven. El ia confirma tota, ia recorda tota, ia gusta tota, e ia sufri un
ajita la plu strana. Es sola aora, cuando la fases joios de se mesma pasada e Dick es torseda a via
de los, ce el recorda la fantasma, e deveni consensa ce esta regarda el en un modo intensa, an
cuando la lus sur se testa arde multe clar.
"Un ata peti" – la fantasma dise – "ia fa esta persones bobo deveni tan plen de grasia."
"Peti?" – Scrooge repete.
La spirito jesti ce el ta escuta la du aprendores, ci parla de Fezziwig, lodante el con tota se
cores; e a pos, la spirito dise:
"Per ce? Esce la ata no ia es peti? El ia spende no plu ce alga paundes de tu mone mortal: cisa
tre o cuatro. Esce esta es tan multe ce el merita esta loda?"
"No es tal." – Scrooge dise, stimulada par la comenta, e parlante sin intende como se mesma
plu joven, no la plu vea – "No es tal, Spirito. El ave la capasia de fa nos deveni felis o nonfelis;
de fa nos labora es lejera o cargos; un plaser o un luta. Si nos dise ce se capasia ave la forma de
parolas e regardas, en cosas tan minor e nonimportante ce soma e conta los no es posible, alora
– ce? La felisia cual el dona es egal grande como si el ta costa un monton de mone."
El senti la regarda de la spirito, e para.
"Ce disturba tu?" – la fantasma demanda.
"No cosa spesial." – Scrooge dise.
"Alga cosa, me crede?" – la fantasma insiste.
"No." – Scrooge dise – "No. Me ta gusta si me ta pote dise un parola o du a me secretor a esta
momento. Sola acel."
Se mesma pasada redui la lampas an cuando el vosi la desira – e Scrooge e la fantasma sta
denova la un asta la otra su la sielo.
"Me tempo es cuasi usada." – la spirito nota – "Rapida!"
Esta no es dirijeda a Scrooge, o a cualcun ci el pote vide, ma el produi direta un resulta – car
Scrooge vide denova se mesma. El es aora plu vea: un om en la tempo florinte de se vive. Se fas
no ave la linias sever e rijida de la anios plu tarda, ma el ia comensa ja porta la sinias de ansia e
avaria. Ave un move zelos, egos, ajitada en la oio, cual mostra la pasion cual ia radisi, e do la
ombra de la arbor cresente va cade.
El no es solitar, ma el senta a la lado de un xica bela joven en vestes de lamenta; en la oios de
la xica ave larmas, cual sintili en la lus cual brilia de la Fantasma de Natal Pasada.
"Importa poca." – la xica dise, cuieta – "A tu, vera poca. Un otra idol ia desloca me; e si el
pote felisi e comforta tu en la tempo futur, como me ta atenta fa, me ave no razona justa per
lamenta."
"Cual idol ia desloca tu?" – el responde.
"Un idol de oro."
"Regarda la justia con cual la mundo trata se!" – el dise – "Ave no cosa contra cual el es plu
dur ce contra la povria; e ave no cosa cual se declaras condena con plu severia ce la xasa de
ricia!"
"Tu teme tro multe la mundo." – el responde, jentil – "Tota tu otra esperas ia fusa se en la
espera de evade la posible de se reproxas vil. Me ia vide tu aspiras plu nobil cade a via, la un
pos la otra, asta cuando tu es preocupada par la pasion dominante, la profita.
"E donce – ce?" – el replica – "An si me ia deveni tan multe plu saja, alora ce? Me no ia
cambia en me relata a tu."
La xica nega con se testa.
"Me ia cambia?"
"Nos ave un contrata vea. Nos ia fa el cuando ambos de nos ia es povre e contente de resta tal
asta cuando, a la bon momento, nos va pote boni nos fortuna mundal par nos labora pasiente. Si,
tu es cambiada. A la tempo de nos contrata, tu ia es un otra om."
20