An si los ia <strong>par</strong>ti de la scola ante sola un momento, los es aora en la stradas ocupada de un site, do pasajores ombrin pasa e repasa, do caros e vagones ombrin batalia per la via, e do ave tota la disputa e caos de un site real. Es vera clar, <strong>par</strong> la decoras de la botecas, ce ance asi es denova la tempo de natal; ma es la sera, e la stradas es luminada. La fantasma <strong>par</strong>a a la porte de un boteca elejeda, e demanda Scrooge si el conose el. "Conose el?" – Scrooge dise – "Me ia es asi un aprendor!" Los entra. Vidente un senior vea en un xapeta de lana, ci senta pos un scriveria tan alta ce, si el ta ave sinco plu sentimetres de altia, el ta nesesa colpa se testa contra la sofito, Scrooge esclama en stimula grande: "O, es Fezziwig Vea! Ta ce Dio bondise se cor! Es Fezziwig, denova vivente!" Fezziwig Vea reposa se pen, e leva se regarda a la orolojo, cual indica la ora sete. El frica se manos, ajusta se jaceta spasios; rie tra tota se corpo, de se sapatos a se organo de bonvole; e esclama en un vose amable, lisa, rica, abundante e amin: "He, alo! Ebenezer! Dick!" La varia pasada de Scrooge, aora un om joven adultinte, entra enerjios, acompaniada <strong>par</strong> se coaprendor. "Dick Wilkins, serta!" – Scrooge dise a la fantasma – "Me bon Dio, si. Ave el ala. El ia es vera multe amin a me, acel Dick. Dick la povre! Ai, ai! "Alo, me xicos!" – Fezziwig dise – "No plu labora a esta note. La sera de natal, Dick. Natal, Ebenezer! Ta ce nos covre la fe<strong>net</strong>ras" – Fezziwig Vea cria, con un bate subita de se manos – "ante cuando me pote conta a dudes!" Tu no ta crede como acel du omes ia emprende la taxe! Los freta en la strada con la covrefe<strong>net</strong>ras – un, du, tre – pone los en se locas – cuatro, sinco, ses – fisa los con baretas e spinos – sete, oto, nove – e reveni ante cuando on ta pote ateni des-du, respirante como cavalos pos un corsa. "Hi ha ho!" – Fezziwig Vea esclama, brincante de la scriveria alta con ajilia mervelios – "Posa la sala, me xicos: nos ta ave asi multe spasio! Hi ha ho, Dick! Vade bon, Ebenezer!" Posa la sala! Ave no cosa cual los no ta move, o no ta pote move, su la regarda de Fezziwig Vea. Los fa tota en un minuto. Los paci cada mobila a via, como si los despedi los de la vive publica per sempre; los scopi e duxi la solo, los sisori la lampas, los pila combustables sur la foco; e la boteca deveni un salon de balo tan comfortos e calda e seca e luminada como on ta desira vide a un note de inverno. Un violiniste entra con un libro de musica, e vade a la scriveria alta, e condui como un orcestra, ajustante se strumento con un ruido simil a sincodes doles de ventre. Seniora Fezziwig entra, vera no plu ce un surie vasta. La tre senioretas Fezziwig entra, radiante e amable. La ses seguores joven entra, de cual la senioretas va rompe se cores. Tota la jovenes empleada en la comersia entra. La cameror fema entra, con se cusin, la panor. La cosinor entra, con la ami spesial de se frate, la letor. La xico de ultra la strada entra, de ci on suspeta ce el no ia reseta comedas sufisinte de se mestre; el atenta asconde se pos la xica de la boteca cuasi visina, de ci on ia descovre ce se mestresa ia tira se oreas. Tota de los entra, la un pos la otra; alga es timida, alga es corajos, alga es refinada, alga es torpe, alga puia, alga tira; tota de los entra, en cualce modo e cada modo. Tota de los comensa dansa, dudes duples a la mesma tempo; los teni la manos, fa un dui de un sirculo, e reveni en la otra dirije; sirca sirculos en grados varios de grupos amante; la du gidores presedente verje sempre a la mal momento; la du gidores seguente recomensa direta cuando los ariva ala; final, tota duples deveni la gidores, e ave no nongidores per aida los! Pos la ateni de esta resulta, Fezziwig Vea, batente se manos per <strong>par</strong>a la dansa, cria – "Bon fada!" – e la violiniste puxa se fas calda en un vaso de bir brun, spesial furnida per esta usa. Ma despetante reposa, cuando el rea<strong>par</strong>e, el comensa denova, an si ave no plu dansores, como si on ia porta la violiniste presedente a casa, completa fatigada, sur un covrefe<strong>net</strong>ra, e como si el se mesma es un musiciste nova, determinada de suprapasa la otra, su risca de mori. Ave plu dansas, e ave un jua de multas, e plu dansas, e ave torta, e ave vino spisida, e ave un peso grande de carne rostada fria, e ave un peso grande de carne bolida fria, e ave tartetas de fruta secida, e un abunda de bir. Ma la efeto grande de la sera veni pos la rostada e la bolida, 18
cuando la violiniste (un tipo destros, nota! – un om de la spesie ci comprende eselente se labora, plu bon ce tu o me ta pote esplica a el!) inisia la melodia "Sir Roger de Coverley". Alora, Fezziwig Vea avansa per dansa con Seniora Fezziwig. Los es an la gidores, frontinte un bon taxe vera difisil; dudes-tre o dudes-cuatro duples de dansores; persones ci on trata usual en un modo seria; persones ci insiste dansa, e ave no intende de pasea. Ma si la cuantia de esta persones ta es plu grande an a du veses – ha, cuatro veses – Fezziwig Vea ta es egal de los, e Seniora Fezziwig ance. Regardante el, el merita es la acompanior de se sposo en cada sensa de la <strong>par</strong>ola. Si acel no es un loda alta, dona un plu alta, e me va usa el. La suras de Fezziwig <strong>par</strong>e emete vera un lus. Los brilia como lunas en cada <strong>par</strong>te de la dansa. On no ta pote predise, a cualce momento elejeda, cual cosa los va fa a la momento seguente. E cuando Fezziwig e Seniora Fezziwig ia pasa tra tota la dansa – avansa e retira, ambos manos a se acompanior, inclina e plia se jenos, tiratapo, fili la ago, e reveni denova a se loca – Fezziwig salta batente se pedes, tan ajil ce el <strong>par</strong>e ginia con se gamas, e recade sur se pedes sin bambola. 19