par Charles Dickens - wikia.nocookie.net

om ia pensa ce el sonia, ma el no ia es soniante. Ia es la Papagaio, tu sabe. Ave ala Venerdi, ci
core per se vive a la rieta peti! Vade! Ui! Alo!"
Alora, cambiante con un rapidia multe stranjer de se carater usual, el dise, en compati per se
mesma pasada, "La xico povre!" e plora denova.
"Me desira..." – Scrooge murmura, ponente se mano en se pox e regardante sirca se, pos seci
se oios con se polso de manga – "Ma es aora tro tarda."
"Ce disturba tu?" – la Spirito dise.
"No cosa." – Scrooge dise – "No cosa. Un xico ia fa un canta de natal a me porte, a la sera
pasada. Me ta gusta si me ia dona alga cosa a el – sola acel."
La fantasma surie pensos, e branda se mano, disente a la mesma tempo – "Ta ce nos vide un
otra natal!"
A esta parolas, la varia pasada de Scrooge grandi, e la sala deveni alga plu oscur e plu susia.
La paneles diminui, la fenetras fesuri; fratos de jeso cade de la sofito, e la bandas de lenio apare
en loca; ma Scrooge sabe no plu ce tu como tota esta es fada. El sabe sola ce esta es plen coreta;
ce tota ia aveni en acel modo; ce ave ala el se mesma, denova solitar, cuando tota la otra xicos ia
vade ja a se casas per la festas felis.
El no leje aora, ma el pasea de asi a ala en un modo desperante. Scrooge regarda la fantasma,
e, negante triste con se testa, el regardeta ansios en dirije a la porte.
El abri; e un xica peti, multe plu joven ce la xico, entra corente, e pone se brasos sirca se
colo, e besa el a multe veses, parlante a el como se "frate cara, cara".
"Me ia veni per retrae tu a casa, frate cara!" – la enfante dise, batente se manos peti la un
contra la otra, e pliada par rie – "Per retrae tu a casa, casa, casa!"
"A casa, Fran peti?" – la xico responde.
"Si!" – la enfante dise, con deleta suprafluente – "A casa, per tota tempo. A casa, per sempre
plu. Padre es tan multe plu amante ce a ante, ce la casa sembla la paradiso! A un note cara,
cuando me ia es vadente a leto, el ia parla a me en un modo tan jentil ce me no ia teme demanda
el a un ves nova si tu ta veni cisa a casa; e el ia dise ce si, tu debe; e el ia envia me en un vagon
per retrae tu. E tu va es un om!" – la enfante dise, abrinte se oios – "e tu va reveni nunca asi. Ma
prima, nos va es la un con la otra tra la natal intera, e va pasa la tempo la plu joios en tota la
mundo."
"Tu es un fem notable, Fran peti!" – la xico esclama.
La xica bate se manos e rie, e atenta toca la testa de la xico; ma car el es tro peti, el rie
denova, e sta sur la ditos de se pedes per abrasa el. Alora el comensa tira la xico, en se zelo
enfantin, en dirije a la porte; e la xico acompania el, resistente a no grado ce los vade.
Un vose teroros en la atrio cria – "Vade trae la valison de Senioreto Scrooge a su!" – e la
mestre de scola se mesma apare en la atrio. El fisa Senioreto Scrooge con un regarda coler de
superioria feros, e puxa el en un state de mente asustada par presa manos con el. Alora el gida la
xico e se sore a un salon vea cual es, de tota tal salas en la mundo, vera la plu simil a un caveta
fria, do la mapas sur la mur, e la globos de sielo e tero en la fenetras, es sirin par fria.
Asi el estrae un carafa de vino strana lejera, e un bloco de torta strana pesos, e furni partes de
esta deletas a la jovenes. A la mesma tempo, el envia un servor magra per ofre un vitro de "alga
cosa" a la gidor de vagon, ci responde ce el grasia la senior, ma, si la vino es de la mesma spesie
como el ia proba a ante, el ta prefere no bevi el.
Car a esta tempo la valison de Senioreto Scrooge es ja liada a la culmine de la vagon, la
enfantes dise a la mestre un adio vera desirada, e, pos entra la vagon, los vade felis longo la
stradeta de jardin. La rotas rapida colpa la jela e neva de sur la folias oscur de la arbores perene,
como un jeta.
"Tu sore ia es sempre un creada delicata, ci ta pote colasa a un respira." – la fantasma dise –
"Ma el ia ave un cor grande!"
"Si, vera." – Scrooge esclama – "Tu razona bon. Me no va nega el, spirito. Ta ce Dio proteje
me!"
"El ia mori como un fem" – la fantasma dise – "e ia lasa enfantes, me crede."
"Un enfante." – Scrooge replica.
"Vera." – la fantasma dise – "Tu sobrino!"
Scrooge pare noncuieta en se mente, e responde corta – "Si."
17