par Charles Dickens - wikia.nocookie.net

capas de teni con fortia noncomun. Se gamas e pedes, multe delicata formida, es nuda como
acel membros alta.
El porta un camison de blanca la plu pur; e sirca se taie un sintur refletante, de cual se brilieta
es bela. El teni un ramo de ilex fresca e verde en se mano; e, en un contradise bizara de acel
sinia invernal, se veste es decorada con flores de estate. Ma se cualia la plu strana es ce, de la
culmine de se testa, un jeta clar briliante de lus es saltante, par cual tota de esta es vidable, e
cual es sin duta la razona per cual el usa como un xapeta, en se momentos plu sombre, un
estinguicandela grande cual el porta aora su se braso.
Ma an esta, cuando Scrooge regarda el con atende cresente, no es se cualia la plu strana. Car,
simil a la modo en cual se sintur sintili e brilia aora en un parte, e aora en un otra, e la luminada
a un momento deveni oscur a un otra, en la mesma modo la figur se mesma flutua en se claria.
El es aora un esente con un braso, aora con un gama, aora con dudes gamas, aora un duple de
gamas sin testa, aora un testa sin corpo, e no trasa de la membros disolvente es vidable en la
oscuria densa en cual los fonde desaparente. E de tempo a tempo entre esta mervelias, el deveni
denova se mesma, tan clar e persepable como sempre.
"Senior, esce tu es la spirito de cual se veni ia es prediseda a me?" – Scrooge demanda.
"Me es!"
La vose es mol e jentil, e strana basa, como si, en loca de es tan prosima a se lado, el ta es a
un distantia.
"Ci tu es, e ce tu es?" – Scrooge demanda.
"Me es la Fantasma de Natal Pasada."
"De multe anios pasada?" – Scrooge demanda, oservante se altia nanin.
"No. De tu pasada."
Cisa Scrooge no ta pote esplica a cualcun se razona, si cualcun ta pote fa la demanda; ma el
ave un desira spesial de vide la spirito en se xapeta, e el prea el de covre se.
"Ce?" – la fantasma esclama – "Tu ta estingui tan rapida, con manos mundal, la lus cual me
dona? Esce no sufisi ce tu es un de los de cual se pasiones ia crea esta xapeta, e obliga me porta
el basa sur me fronte tra series longa de anios?"
Scrooge nega respetos tota intendes de ofende e cualce sabes ce el ia "xapi" volente la spirito
en cualce periodo de se vive. El osa alora demanda cual razona ia fa la fantasma veni asi.
"La bon destina de tu!" – la fantasma dise.
Scrooge espresa ce el es multe grasios, ma el no pote evita pensa ce un note de reposa
nondisturbada ta gida plu bon a acel gol. Es clar ce la spirito ia oia el pensa, car el dise sin
pausa:
"Tal, la converti de tu. Atende!"
El estende se mano forte cuando el parla, e teni jentil se braso.
"Leva! E pasea con me!"
Ta es futil si Scrooge ta cexa ce la clima e la ora no conveni per la pasatempo de pasea; ce la
leto es calda, e la termometre mostra un temperatur multe su acel de jela; ce el es sola lejera
vestida en se pantoflas, roba de bani, e xapo de note; e ce el ave cataro a esta tempo. La teni, an
si jentil como la mano de un fem, no pote es resisteda. El leva, ma pos trova ce la spirito vade
en dirije a la fenetra, el saisi la veste de la spirito en prea.
"Me es un mortal" – Scrooge protesta – "e capas de cade."
"Aseta sola un toca de me mano ala" – la spirito dise, ponente el sur se cor – "e tu va es
suportada en plu situas ce esta!"
An cuando la parolas es parlada, los pasa tra la mur, e sta sur un rua de campania sin
construidas, con campos a cada lado. La site ia desapare intera. No trasa de el es vidable. La
oscuria e la nebla ia desapare ance, car la dia es clar, fria e invernal, con neva sur la tera.
"Me bon Dio!" – Scrooge dise, teninte se manos en junta cuando el regarda sirca el – "Me ia
es elevada en esta loca. Me ia es un xico asi!"
La spirito contempla el en un modo dulse. Se toca jentil, an si el ia es lejera e pronto, pare
ancora es presente a la sensa de senti de la om vea. El es consensa de mil odores cual flota en la
aira, e cada de los es liada con mil pensas, e esperas, e joias, e consernas ja oblidada ante multe
multe tempo!
"Tu labio trema." – la fantasma dise – "E ce es acel sur tu jena?"
15