par Charles Dickens - wikia.nocookie.net

Strofe 2
La prima de la tre spiritos
Cuando Scrooge velia, es tan oscur ce, regardante de se leto, el pote apena distingui la fenetra
nonopaca de la mures solida de se camera. El atenta perfora la oscuria con se oios furonin,
cuando la tintinas de un eglesa visina sona la cuatro cuatris. Donce el escuta per descovre la ora.
A se stona grande, la campana pesos continua de ses a sete, e de sete a oto, e en un modo
coerente asta des-du; alora el para. Des-du! Ia es pos la ora du cuando el ia vade a leto. La
orolojo era, clar. Cisa un spina de jela ia entra se macina. Des-du!
El toca la mola de se orolojeta de pox, per coreti esta orolojo vera asurda. El fa des-du pulsas
peti e rapida, e para.
"Ma no es posible" – Scrooge dise – "ce me ia dormi tra un dia intera e a profonda en la note
seguente. No es posible ce la sol ia sufri alga cambia, e ce esta es la ora des-du de media-dia!"
Car esta es un idea alarmante, el trepa de se leto e palpa se via a la fenetra. El es obligada de
frica la jela de sur el con la manga de se roba de bani ante pote vide cualce cosa – e, an alora, el
pote vide vera poca. El pote deteta sola ce es ancora multe neblos e estrema fria, e ce ave no
ruido de persones ci core de asi a ala, creante multe ajita, como ta aveni nondutada si la note ta
vinse la dia briliante e ta saisi la controla de la mundo. Esta es un lejeri grande, car la parolas
"paia a Senior Ebenezer Scrooge o se encargada a tre dias pos vide esta bileta de intercambia" ta
deveni nonvaluada como un garantia finansial de la Statos Unida si no ave dias par cual on ta
pote conta.
Scrooge vade denova a leto, e pensa, e pensa, e pensa sur esta, denova, denova, denova, e
pote comprende el en no modo. Plu el pensa, plu el es confondeda; e plu el atenta no pensa, plu
el pensa.
La fantasma de Marley preocupa el estrema multe. Sempre cuando el deside a se, pos un
esamina developada, ce la cosa intera ia es un sonia, se mente revola denova a se posa prima,
como cuando on libri un mola forte, e presenta la mesma problem per studia laboros – "Esce el
ia es un sonia o no?"
Scrooge resta reclinada en esta state asta la tintina de tre plu cuatris, cuando el recorda subita
ce la fantasma ia avisa el de un visita cuando la campana sona la ora prima. El deside reposa
veliada asta cuando la ora ia pasa; e, si on considera ce la adormi es no plu posible per el ce la
vade en la sielo, esta es cisa la deside la plu saja de cual el es capas.
La cuatri es tan longa ce, a plu ce un ves, el es convinseda ce el ia afonda ja sin persepi en un
dormeta, e no ia oia la orolojo. Final el percuse se oio escutante.
"Tin, tan!"
"Un cuatri." – Scrooge dise, contante.
"Tin, tan!"
"Un di!" – Scrooge dise.
"Tin, tan!"
"Tre cuatris." – Scrooge dise.
"Tin, tan!"
"La ora se mesma" – Scrooge dise vinsos – "e no otra cosa!"
El parla ante cuando la campana de la ora sona, cual aveni aora en un modo basa, sombre,
vacua, triste: UN. A la mesma momento, lus brilia en la sala, e la cortinas de se leto es tirada a
lado.
La cortinas de se leto es tirada a lado, me dise a tu, par un mano. No la cortinas a se pedes, e
no la cortinas a se dorso, ma los a cual se fas es dirijeda. La cortinas de se leto es tirada a lado; e
Scrooge, saltante a un posa partal reclinante, trova ce el fronti direta la visitor nonteral ci tira los
– tan prosima a el como me es aora a tu, e me sta en me mente a tu codo.
El es un figur strana – simil a un enfante: ma no tan simil a un enfante como simil a un om
vea, regardada tra alga medio supranatural, cual dona la ilude ce el ia retrosede de la vista e ia es
diminuida a la grandia de un enfante. Se capeles, cual pende sirca se colo e desende longo se
dorso, es blanca como si par eda; e, an tal, la fas conteni an no un plieta, e la pel brilieta en la
modo la plu tenera. La brasos es multe longa e musculos; la manos es ance tal, como si el es
14