par Charles Dickens - wikia.nocookie.net

Scrooge trema sempre plu.
"O esce tu vole sabe" – la fantasma continua – "la pesa e longia de la cordon forte cual tu
porta, tu mesma? El ia es tan pesos e tan longa como esta, ante sete seras de natal. Tu ia labora a
el a pos. El es vera un cadena pesos!"
Scrooge regarda la solo sirca se, espetante trova ce el es ensircada par cisa novedes o sento
metres de cordon de fero. Ma el vide no cosa.
"Jacob." – el dise, preante – "Jacob Marley, me vea, dise plu. Parla per comforta me, Jacob!"
"Me ave no comforta per dona." – la fantasma responde – "Acel veni de otra locas, Ebenezer
Scrooge, e es furnida par otra ajentes, a otra spesies de person. Plu, me no pote dise a tu la cosas
cual me vole. On permete me dise sola vera poca plu. Me no pote reposa, me no pote resta, me
no pote permane en cualce loca. Me spirito ia pasea nunca ultra nos sala de contas – nota! – en
vive, me spirito ia vaga nunca ultra la limitas streta de nos buco de cambia mone; e viajas
fatigante es me futur!"
Es un abitua de Scrooge, sempre cuando el deveni pensos, ce el pone se manos en la poxes de
se pantalon. Aora, considerante la dises de la fantasma, el fa esta, ma sin alti se regarda o leva se
de se jenos.
"Clar, tu ia fa esta en un modo multe lenta, Jacob." – Scrooge comenta en un manera pratical,
an si con umilia e respeta.
"Lenta!" – la fantasma repete.
"Mor per sete anios" – Scrooge murmura pensos – "e viajante per tota la tempo!"
"Tota la tempo." – la fantasma dise – "Sin reposa, sin pas. Un tortura nonsesante de regrete."
"Tu viaja rapida?" – Scrooge dise.
"Sur la alas de la venta." – la fantasma responde.
"Cisa tu ia pote traversa un cuantia grande de la tera en sete anios." – Scrooge dise.
La fantasma, oiante esta, crea denova un cria, e tintina se cadena en la silentia completa de la
note en un modo tan xocante ce la polises ta ata justa si los ta aresta el par fa un irita.
"O! Tu es caturada, liada, e duple cadenida," – la fantasma esclama – "car tu no sabe ce edas
de labora nonsesante par esentes nonmortal per esta tera debe pasa a eternia ante la developa
plen de la bonia de cual el es capas. Tu no sabe ce cada spirito cristian ci labora jeneros en se
area peti, an de cualce spesie, va trova ce se vive mortal es tro corta per se medios vasta usos.
Tu no sabe ce no cuantia de repenti pote compensa per la malusa de la capasias de un vive! Ma
me ia es tal! O! Me ia es tal!"
"Ma tu ia es sempre un bon om en consernas comersial, Jacob." – Scrooge balbuta, ci
comensa aora aplica esta a se mesma.
"Consernas!" – la fantasma esclama, torsente denova se manos. – "La umanas ia es me
consernas. La bon destinas comun ia es me consernas. Carita, compati, tolera e bonvole – tota ia
es me consernas. La operas de me comersia ia es no plu ce un gota de acua en la mar completa
de me consernas!"
El teni se cadena a la longia de se braso, como si esta es la causa de tota se tristia futil, e lansa
el denova sur la tera en un modo pesos.
"A esta tempo de la anio progresante," – la fantasma dise – "me sufri la plu. Per ce me ia
pasea tra folas de otra umanas con me oios basida, e ia leva los nunca a acel Stela santa cual ia
gida la Res Saja a un abitada povre! Esce ia ave no casas povre a cual se lus ta gida me?"
Scrooge es multe angusada de oia la fantasma continua en esta manera, e comensa trema
estrema multe.
"Oia me!" – la fantasma cria – "Me tempo es cuasi pasada."
"Me va oia." – Scrooge dise – "Ma no es dur a me! No parla floros, Jacob! Per favore!"
"Como aveni ce me apare ante tu en un forma cual tu pote vide, me no pote dise. Me ia senta
nonvidable asta tu a multe multe dias."
Esta no ia es un idea plasente. Scrooge trema, e frota la sua de se fronte.
"Acel es un parte nonlejera de me espia." – la fantasma continua – "Me es asi a esta note per
avisa tu ce tu ave ancora un posible de espera evade me fortuna. Un posible de espera cual me ia
oteni per tu, Ebenezer."
"Tu ia es sempre un bon ami per me." – Scrooge dise – "Grasias!"
"Tu va es visitada" – la fantasma recomensa – "par tre Spiritos."
11