apoio social e hipertension arterial esencial - Universidade de Vigo

E. – DISCUSION
1.- Discusión do plantexamento do estudio
Tendo en conta o obxectivo principal do estudio e a existencia de rexistros nas historias
clínicas, poderíamos ter optado por un deseño retrospectivo pero desbotámolo pola non
estandarización das tomas de tensión arterial e por non alterar o principio da temporalidade
causal, xa que descoñecemos a exposición ó apoio social dos pacientes nos anos anteriores.
Un estudio transversal poderíanos axudar a detectar asociacións entre as variables
estudiadas pero non poderíamos establecer relacións causa-efecto. Por todo isto, optamos, a pesar
da súa maior complexidade, por un deseño prospectivo de seguimento, xa que, deste modo,
encetamos o estudio coa medición inicial do factor analizado (apoio social), monitorizándoo ó
longo do seguimento e medindo periódicamente a variable a contrastar (presión arterial). Con
estas premisas podemos aceptar ou rexeitar a hipótese nula, que se formula como obxectivo
principal deste estudio.
A metodoloxía seguida para elaborar o deseño do estudio parte da redacción dun plan
traballo base, discutido logo con expertos en atención familiar e metodoloxía da investigación.
As súas aportacións quedaron plasmadas no deseño definitivo.
Poderíamos ter realizado o estudio en poboación xeral, onde posiblemnete atoparíamos
maiores diferencias en canto ó apoio social, por ser unha mostra menos homoxénea cá da
poboación hipertensa. Outra posibilidade sería realizar un estudio comparativo entre pacientes
hipertensos e normotensos, neste caso o seguimento dos individuos normotensos sería máis dificil
pois non acuden regularmente ó centro de saúde. Estas dúas opcións servirían para investigar a
asociación entre o apoio social e a hipertensión na nosa poboación xeral, mais esta asociación xa
se ten realizada noutros paises.
99