apoio social e hipertension arterial esencial - Universidade de Vigo

Blazer encontra no seu estudio realizado en Carolina do Norte sobre poboación de máis
de 65 anos que determinadas subclases de apoio social como son: a frecuencia de interacción
social, os roles e vínculos do individuo e o apoio social percibido son predictores de mortalidade
a 30 meses cun risco relativo de 2.04, 3.40 e 1.88 respectivamente 20 .
As características da rede social (tamaño, densidade, frecuencia de contactos)
demostran ser predictores de mortalidade global en estudios lonxitudinais prospectivos 21, 22 .
Todos estes achados víronse confirmados noutros estudios prospectivos efectuados en
comunidades distintas 23, 24, 25, 26 . Na táboa 1 expóñense un resumo dos estudios que relacionan
o apoio social e a mortalidade en suxeitos previamente sans.
3.2. USO DE SERVICIOS SANITARIOS
Tamén se ten investigado o apoio social dos individuos e os seus familiares en relación
coa utilización dos servicios sanitarios. Así, un baixo apoio social funcional parece determinar
unha hiperutilización dos servicios médicos 27 . Como os servicios de saúde constitúen parte da
rede social, a carencia de recursos tanto persoais como familiares para afrontar os acontecementos
vitais estresantes, pode impulsar o individuo á utilización dos servicios sanitarios, especialmente
os de Atención Primaria.
O illamento social, a ausencia de parentes próximos e a escasa ou nula relación cos fillos
propicia o internamento en residencias ou asilos dos anciáns. O principal predictor da
institucionalización do ancián é a idade e o seu grao de apoio social 14 .
21