apoio social e hipertension arterial esencial - Universidade de Vigo

Contrariamente, hai datos doutros estudios de intervención que presentan uns resultados
contradictorios 59, 149 , pois refiren escaso ou nulo beneficio tras intervencións sobre o apoio
social. De todos os xeitos, trátase de estudios con escaso número de pacientes e menor tempo de
seguimento cós traballos anteriormente comentados.
En pacientes con cardiopatía isquémica establecida existen importantes traballos de
intervención, nun intento de mellorar a recuperación destes pacientes 150 . Nunha recente
metaanálise realizado por Linden e colaboradores demóstrase un beneficio significativo cando
intervencións psicosociais se engaden ó manexo rutineiro dos pacientes con patoloxía coronaria
151 , presentando, o grupo de intervención, unha menor mortalidade e morbilidade (43% de
reducción de eventos cardíacos), menor estrés psicolóxico e maior reducción dalgúns factores de
risco. O beneficio é máis evidente durante os dous primeiros anos.
Nesta metaanálise todos os tipos de intervencións psicosociais presentan un efecto
beneficioso. Isto estaría en consonancia coa corrente bibliográfica que, ó analizar os resultados
da psicoterapia, observa que o beneficio non está especialmente ligado á técnica, senón, a
factores como o apoio emocional, ó establecemento dunha esperanza ou ó sentido de
autocontrol.
Como sinala Levy, nunha revisión do tema 152 , numerosos estudios refiren un efecto
positivo do apoio social sobre a adherencia e os resultados clínicos en diversas patoloxías crónicas
como a diabete mellitus, hipertensión arterial, deshabituación tabáquica, programas de reducción
de peso ou tratamento das lumbalxias crónicas. Quedaría por definir que tipo de manipulación do
apoio social é a máis efectiva: terapias grupais, apoio intrafamiliar, consultas motivacionais,
grupos de autoaxuda ou abordaxes onde se combinen diversas técnicas.
132