apoio social e hipertension arterial esencial - Universidade de Vigo

Encontramos que os individuos hipertensos con familias non nucleares presentan maior
risco de abandono do programa, esta asociación é observable na táboa 44. As variables, baixo
apoio social afectivo e o vivir nunha familia disfuncional , case acadan significación estatística
(p=0.07 e p=0.055 respectivamente) para a mala adherencia ó programa. A maior parte dos
documentos de consenso sobre a hipertensión arterial que analizan o problema do cumprimento
aconsellan implicar ás familias no tratamento, e ofrecen unha serie de estratexias para mellorar
a observancia 55, 56 . Con todo, non encontramos ningún traballo científico que estudie
específicamente estas variables respecto da asistencia ás visitas de control feitas por un profesional
sanitario.
Si existen, polo contrario, traballos de intervención que, tras incidir sobre o apoio
familiar dos pacientes que presentan hipertensión arterial, acadan mellores resultados respecto
da adherencia e dos cambios nos estilos de vida 100, 144, 145, 146, 147 . Morisky e colaboradores, nun
estudio experimental con control aleatorio sobre 400 hipertensos seguidos durante 5 anos,
demostran a existencia dunha sorprendente asociación entre a implicación da familia no
tratamento da hipertensión e o índice de mortalidade global 148 . Estudiaron o impacto de tres
intervencions educativas diferentes (a entrevista motivacional co paciente, o apoio intrafamiliar
xeralmente co conxuxe e as sesións con grupos reducidos de pacientes); a participación do
conxuxe non só mellorou a cumprimentación senón que reduciu significativamente a presión
arterial, o control do peso e o índice xeral de mortalidade. En conxunto, a taxa de mortalidade
xeral dos grupos experimentais mostrou unha reducción global do 57% comparada cos grupos
control. A taxa de mortalidade relacionada coa hipertensión arterial experimentou un descenso
do 53% no grupo intervención. As intervencións mixtas (entrevista motivacional + apoio
intrafamiliar + sesións grupais ) son as de máis impacto. Illadamente, a intervención de máis
impacto para acadar un mellor control da presión arterial foi a da implicación da familia no
tratamento do paciente.
131