apoio social e hipertension arterial esencial - Universidade de Vigo

2.- VARIABLES FAMILIARES UTILIZADAS NOS ESTUDIOS
DE INVESTIGACION
Prescindindo do estado civil dos individuos, a primeira forma de achegarse ó estudio
da atención familiar é coñece-la súa estructura. Estudiar a estructura familiar ( composición
familiar), significa unha primeira aproximación á familia, para coñecer os individuos que a
forman, os graos de parentesco, as formas de vida familiar, ou o tipo de vínculos entre os
elementos que habitan no fogar.
Podemos distinguir, atendendo ó número de membros e á súa composición, diversos tipos
de familias: a familia extensa que estaría constituída por unha agrupación numerosa na que xunto
ós pais e fillos conviven avós, tíos, primos, etc, abranguendo dúas ou máis xeracións. A familia
nuclear sería aquel subsistema social onde viven dous adultos de sexos opostos que exercen o
papel de pais de un ou máis fillos 9 . Na sociedade moderna o modelo de familia tradicional
extensa vai desaparecendo a favor da familia nuclear, sobre todo no medio urbano.
Outra tipoloxía familiar,menos común, é a das chamadas familias monoparentais formadas
polo pai ou a nai e os fillos. Xorde como consecuencia do abandono do fogar por un dos
conxuxes sexa por falecemento, por divorcio ou pola existencia de pais solteiros. Podemos atopar
outros tipos de familias (familias alternativas) , que implican unha forma de vida similar como son
as comunas, parellas homosexuais, grupos de relixiosos, etc.
Pero a estructura familiar non é un fenómeno estático, se nón un proceso dinámico desde
a súa formación ata a súa disolución. Este proceso está constituído por etapas de complexidade
crecente ás que seguen outras de simplificación familiar, variando en cada unha as características
sociais e económicas.
13