apoio social e hipertension arterial esencial - Universidade de Vigo

3.7. ADHERENCIA O TRATAMENTO ANTIHIPERTENSIVO
Pódese defini-la adherencia como o grao en que as expectativas e actitudes do paciente
coinciden coas do profesional sanitario e coas recomendacións para acadar un mellor nivel de
saúde. O problema do mal cumprimento por parte dos pacientes das recomendacións respecto do
tratamento antihipertensivo é cuantitativamente moi importante. Un dos obxectivos secundarios
deste estudio é valorar o hipocumprimento e a súa posible asociación con variables psicosociais.
E por iso que establecemos no deseño do estudio tres consideracións acerca da adherencia os
tratamentos:
• Adherencia á dieta hiposódica
• Adherencia ós fármacos
• Adherencia o programa de control e seguimento da hipertensión arterial
3.7.1. Adherencia á dieta hiposódica
A taxa de mal cumprimento da restricción salina que encontramos no noso traballo foi
do 61.2%, similar a referida na bibliografía, e , tamén, concordante con esta, en ser peor para a
dieta ca para os tratamentos farmacolóxicos.
Todos os autores utilizan a excreción urinaria de sodio como medida do cumprimento
dietético. Dado que a excreción de sodio presenta unha grande variabilidade ó longo do día, para
minimizar esta oscilación recoméndase, como fixemos neste traballo, recoller unha única mostra
de ouriños de 24 horas. Sabemos que cando un individuo segue unha dieta fixa de sodio, é capaz
de estabiliza-la súa excreción de sodio entre 3-5 días. Polo que, a efectos prácticos, abonda con
recoller a mostra tras 4-5 días despois de instaurada a dieta, cousa que cumprían sobradamente
os nosos pacientes , xa que todos eles levan varios anos con indicación de restricción salina 140 .
127