apoio social e hipertension arterial esencial - Universidade de Vigo

De todos modos, pódense observar resultados, as veces discordantes, segundo se
considere o estrés obxectivo ou o autorreferido polo propio individuo 129, 130 . A relación do
reaxuste social secundario ós AVE está máis definido para a patoloxía cardiovascular pero é
menos evidente na patoloxía cerebrovascular 131 .
Nun estudio sobre pacientes diagnosticados de hipertensión arterial esencial en Nagpur
(India) os AVE elevados encontráronse asociados a un peor control da tensión arterial, como
tamén o verificamos no noso estudio 132 . Isaksson e colaboradores observan que a ausencia de
eventos vitais positivos e un escaso apoio emocional están en relación coa hipertensión arterial
resistente 133 . O efecto beneficioso sobre a presión arterial dos eventos vitais positivos tamén está
confirmado en adolescentes sans 134 . Isaksson coincide asi mesmo cos resultados referidos por
Jula e colaboradores 135 nun estudio onde, comparando pacientes normotensos con hipertensos
recén diagnosticados, obxectivan que a alexitimia (escasa capacidade para expresar emocións) se
asocia á hipertensión arterial. Isto podería deberse, como apuntan ambos autores, a que a
alexitimia provoca que os individuos teñan escasa capacidade para responder ás variacións
fisiolóxicas, e sexan máis ríxidos e máis vulnerables ó estrés crónico. Este efecto presor atopado
nalgúns individuos estaría inducido pola dificultade para comunicar os seus propios problemas,
e tamén foi observado en poboación laboral 136 .
No amplo estudio BHTA en pacientes con infarto de miocardio 122 , a presencia de
elevados AVE xunto co illamento social viuse asociado á mortalidade total e a de causa coronaria.
Outra forma de aproximarse a reactividade cardiovascular, á parte da análise da presión
arterial, é mediante o estudio da frecuencia cardíaca. De aí que medrase o interese polo seu
estudio e o seu valor prognóstico. Parece claro que a diminución na variabilidade da frecuencia
cardíaca é un forte predictor de mortalidade nos pacientes con infarto agudo de miocardio 137 .
124