apoio social e hipertension arterial esencial - Universidade de Vigo

3.5.4 Uso de fármacos e tipoloxía familiar
No noso estudio encontramos unha asociación estatísticamente significativa entre a
tipoloxía familiar, o grao da hipertensión e o uso de fármacos hipotensores. De tal forma que
os hipertensos que pertencen a familias nucleares ou extensas presentan un menor grao de
hipertensión (menores cifras de presión arterial no momento do diagnóstico); durante o
seguimento, comprobamos que os pacientes hipertensos que viven en familias con maior número
de membros (nuclear/extensa fronte a monoparental/ equivalentes familiares/ e persoas sen
familia) usan menos fármacos hipotensores para controlar a súa hipertensión arterial.
Non encontramos na bibliografía revisada ningún estudio que relacione a tipoloxía familiar
cós factores mencionados. Deberemos, non obstante, ser cautos á hora de interpretar estos
resultados pois o diagnóstico da hipertensión arterial foi realizado con anterioridade á tipificación
familiar. A pesar de que as modificacións no tipo de familia son pouco frecuentes, sobre todo
nunha poboación como a nosa con idade media de 63 anos, non se poden desbotar cambios que
puideran estar sesgando a asociación entre tipo de familia e grao de hipertensión arterial.
Se aceptamos que o tipo de familia pode ser un indicador da rede social, como así o
describe Elizabeth Bott no seu xa clásico libro de ciencias sociais, ”Familia y red social” 128 onde,
tras estudiar a 20 familias normofuncionantes inglesas, describe ó concepto de rede social e a súa
relación cos distintos tipos familiares. A asociación que describimos entre o tipo de familia e o
consumo de fármacos concordaría coa bibliografía, no senso de que unha rede social máis
pequena condiciona unha elevación das cifras de presión arterial; consecuentemente con iso, sería
preciso nestes pacientes ser máis agresivos (usar máis fármacos) no tratamento da hipertensión
arterial para obter un mellor control.
119