apoio social e hipertension arterial esencial - Universidade de Vigo

paciente diagnosticado de hipertensión esencial e a severidade da vasculopatía hipertensiva en
estadíos segundo a define a OMS. A asociación que encontramos entre apoio social e severidade
da HTA referímola como OR de prevalencia, pois a severidade mediuse ó inicio do estudio e no
se reavaliou ó final do mesmo, porque un ano é un periodo escaso de tempo para esperar cambios
na repercusión visceral. Así pois, deberemos ter en conta a citada limitación na interpretación da
dirección causal entre as dúas variables nos resultados de prevalencia.
Si existen pola contra, estudios prospectivos sobre poboación previamente sá onde se
confirma unha asociación entre a apoio social e o dano orgánico establecido en forma de eventos
cardiovasculares ó final do periodo de seguimento. Así, Vogt e colaboradores 21 refiren, no seu
traballo sobre 2603 individuos sans de Portland (Oregon) seguidos durante 15 anos, que a rede
social é un predictor de incidencia de cardiopatía isquémica. En Gotenbörg (Finlandia) nunha
mostra de 736 homes de mediana idade seguidos durante 6 anos, Orth-Gomer 30 observa que o
apoio afectivo e a integración social se relacionan coa aparición de cardiopatía coronaria. Noutros
dous estudios sobre poboación universitaria e en profesionais da saúde, tamén se confirma a
inflúencia do apoio social sobre a patoloxía cardiovacular 22, 31 .
Hoxendía, e trala aparición dunha ampla variedade de traballos parece que existe consenso
entre os diversos autores no sentido de que en pacientes con infarto de miocardio o apoio
social é un predictor prognóstico na recuperación destes pacientes. Semella que lle ocorre o
mesmo ós pacientes con insufiencia cardíaca conxestiva 118, 119 e con angor pectoris 29 , pero
os datos nestas dúas últimas patoloxías non están tan contrastados coma no caso dos pacientes
post-infartados. Na táboa 2 da Introducción resúmense os principais traballos levados a cabo en
pacientes que sufriron un infarto de miocardio. Así, xa no ano 1983, Chandra e colaboradores 120
publican unha serie con 1401 casos nos que tras 10 anos de seguimento observan que os
individuos casados presentan menos mortalidade. O estado civil confírmase como predictor de
mortalidade no mesmo senso nun estudio sobre 201 pacientes con infarto de miocardio seguidos
durante 100 meses en Gotenbörg 121 .
117