apoio social e hipertension arterial esencial - Universidade de Vigo

3.5.2. Grao de control da hipertensión arterial
Para avaliar o grao de control da hipertensión arterial no noso estudio estratificamos a
tensión arterial ó final do mesmo segundo as cifras de bo control aceptadas na literatura. E un
obxectivo universalmente aceptado o de manter os pacientes hipertensos tratados en cifras por
debaixo de 140/90 mmHg 55 .
Os datos obtidos no estudio aquí presentado detectan un escaso control das cifras
tensionais, sendo mellor o control da tensión arterial diastólica (67.2%) có da sistólica (27.1%).
Estes resultados son coincidentes coa bibliografía. Nun estudio de base poboacional realizado
na nosa provincia, a taxa de pacientes controlados sitúase en torno ó 35% 68 . No estudio
Controlpres 117 , publicado no ano 1998 sobre unha mostra de 6900 pacientes hipertensos de todo
o territorio peninsular, os autores tamén observan un mellor control da tensión arterial diastólica
fronte a sistólica, cuns rangos de porcentaxe similares ós nosos (62.9% de bo control para a
diastólica e 30.2% para a sistólica). Datos quen, así mesmo, concordan con estudios realizados
en paises do noso entorno europeo, así como cos levados a cabo en EEUU e Canadá 55, 117 . A
pesar do escaso número de pacientes que acadan un bo control, tense producido un innegable
avance desde a década dos oitenta no tratamento e control da hipertensión arterial, xa que
respecto do estudio Controlpres do ano 1995 observamos un incremento do 3.3% de mellor
control tensional nos pacientes hipertensos tratados.
Esta disparidade no control dos compoñentes sistólico e diastólico da presión arterial pode
obedecer a varias causas. Unha delas é o envellecemento poboacional que conleva unha maior
prevalencia de hipertensión arterial, superando o 55% en poboación de máis de 65 anos. A
hipertensión sistólica illada neste grupo etáreo oscila entre un 10% -20%. Todo isto condiciona
que a taxa de control da presión arterial diastólica se incremente coa idade e non ocorra o mesmo
coa presión arterial sistólica, como tamén vemos confirmado no noso estudio.
115