apoio social e hipertension arterial esencial - Universidade de Vigo

Nun estudio publicado máis recentemente sobre unha ampla mostra randomizada de 1409
adultos entre 20-70 anos de Búffalo 35 , que presenta unha prevalencia do apoio social semellante
a nosa, Bland e colaboradores encontran unha asociación entre a baixa rede social e o incremento
da tensión arterial sistólica e diastólica. A relación é máis potente para a tensión arterial sistólica
(7 mmHg) ca para a diastólica (4 mmHg), datos coincidentes cos do noso estudio. Ó desglosar
os compoñentes da rede social analizada, observan unha diferencia entre sexos, de tal forma que
nos homes, o tamaño da familia e a participación en asociacións son os aspectos que máis se
relacionan co descenso da tensión arterial; mentres que nas mulleres, a rede social intrafamiliar
(número de parientes) é o que se correlaciona co descenso tensional. Isto explicaríase polo feito
de que as mulleres, xeralmente no mundo occidental, desde a nenez ata a vida adulta están máis
conectadas coa rede de parentesco cós homes.
Noutro estudio amplo levado a cabo no condado de Edgecome en Carolina do Norte
sobre 2030 adultos 38 , tamén se encontra asociación entre o apoio social estructural (baixo apoio
instrumental) e o aumento da tensión arterial. Sendo esta relación máis consistente para individuos
negros con escasos ingresos. Como na nosa mostra, o apoio social percibido polo paciente non
se encontra relacionado coas cifras de presión arterial.
Existe un traballo de investigación sobre poboación negra do sur dos Estados Unidos de
America (EEUU) 39 (n =186) planificado para testar a hipótese do efecto tampón do apoio social
fronte os eventos estresantes que sofre o individuo. Este traballo conclúe que o apoio recibido
da familia nos individuos de máis de 40 anos, e o apoio recibido dos amigos nos individuos máis
xoves, modera o efecto presor do estrés ambiental. Esta diferencia por idades podería ser debida,
como apuntan os autores do artigo, ó diferente contexto social que lles tocou vivir a cada estrato
de idade seleccionado, anterior e posterior á proclamación dos dereitos civís dos negros en
EEUU que modificou a fonte do apoio social dos individios desta raza. Persistindo para os máis
vellos a familia extensa como principal fonte de apoio; mais non para os xoves que pasan a obter
o apoio fundamentalmente dos compañeiros de traballo. Esta diferencia xeracional confírmase
para a tensión arterial sistólica e diastólica nos vellos, pero só para a diastólica nos individuos da
xeración máis nova.
114