Baixar aquí o pdf - Consello da Cultura Galega

Curros Enríquez: Cronobiografía 615
da creación da Academia. O 17 de abril reuniuse na
Habana a Comisión xestora para a fundación en Galicia da
Academia Galega, acto presidido por Curros Enríquez,
durante o cal, en palabras de Calveiro, “habló acerca del
renacimiento de la lengua gallega y defendió el reconocimiento
de la misma como idioma”. O 1 de xullo está datada
unha carta de Curros a Murguía na que lle dá instruccións
para a posta en marcha desta corporación e lle lembra
o deber da Academia de “formar el Diccionario y la
Gramática de nuestra lengua [...]”.
O 30 de xullo, Curros pronuncia un discurso
durante a Xunta xeral ordinaria do Centro Gallego da
Habana apelando a que esta institución lle restablecese a
Murguía a súa subvención, lembrando a súa recente xubilación,
que o deixara nunha situación de precariedade económica.
A Xunta xeral extraordinaria celebrada o 13 de
agosto acordou subvencionar con cincuenta pesos de pensión
mensual ó historiador galego, xubilado sen soldo do
Corpo de Arquiveiros, Bibliotecarios e Anticuarios desde o
19 de maio anterior. Tamén nesta altura, Curros redacta o
prólogo ó libro Galicia de Juan Rivero (La Habana, Atanasio
Rivero Editor, Imp. y Papelería de Rambla y Bouza, 1905).
En opinión dalgúns biógrafos, Vilanova Rodríguez e
Calveiro entre eles, Curros sería autor do limiar ó volume
de artigos de Juan Ramón Somoza Horas de ocio, publicado
ese mesmo ano na Habana.
A composición “Os dióscoros”, de Curros Enríquez,
foi escrita, segundo afirma A. V. Calveiro, este ano, con ocasión
da cea ofrecida polo Diario de la Marina a dous xornalistas
valencianos: José Segarra e Joaquín Juliá, chegados á
Habana en outubro de 1905 (nas Obras escogidas está datada
na Habana en 1907). Foi publicada en Almanaque gallego
para 1908, Buenos Aires, 1907. Con todo, López Varela
opina que mesmo puido ser publicada antes na prensa
cubana.
1906 A renuncia de Tomás Estrada Palma á Presidencia da
República cubana o 28 de setembro provoca a segunda
intervención norteamericana en Cuba.