Baixar aquí o pdf - Consello da Cultura Galega

610 Ana Belén Fortes / Xosé Anxo García López
O 7 de decembro, o comandante galego Cirujeda
dá morte ó xefe da guerrilla cubana, Antonio Maceo, en
Punta Brava. O día 20 ten lugar un Banquete para festexa-la
morte de Maceo, acto patrocinado polo Centro Gallego e
polo Diario de la Marina, no cal traballaba desde había
pouco Curros Enríquez, quen dará evidentes mostras de
desaproba-la devandita celebración.
O día de Nadal, Curros publica no Diario de la
Marina (n.º 307) o poema “En corso”, baixo o título de
cabeceira “La Navidad de 1896”. Este texto figura a carón
doutros traballos en loanza das tropas españolas en Cuba,
dedicados ó exército, á mariña, e “a cuantos en Cuba
defienden la integridad de la patria”; con todo, non se
menciona ó xeneral Valeriano Weyler, capitán xeneral da
illa, dado que non gozaba das simpatías do decano da
prensa cubana. Calveiro acredita que, poucos días despois,
o periódico dedicará un dos seus espacios a eloxia-lo
devandito poema de Curros Enríquez, salientando, de
paso, a capacidade do idioma galego para trata-los máis
variados asuntos. Varios estudiosos, Carré Alvarellos entre
eles, sitúan a publicación deste texto (“En corso”) en 1898,
se cadra por ter sido reeditado nas páxinas dalgún outro
xornal ou revista.
1897 Concesión da autonomía a Cuba.
A xuízo de Adolfo V. Calveiro, durante a guerra
civil cubano-española (1897-98 e comezos de 1899),
Curros só asina “traballos críticos sobre homes e libros”.
Este biógrafo tamén asegura que a revista habaneira El
Hogar publica este ano unha colaboración de Curros (un
poema dedicado a María Tubau, reproducido seguidamente
no Diario de la Marina) nun número dedicado integramente
á actriz española.
No mes de novembro deste ano está datado o prólogo
de Curros (“Duas palabras ô leutor”) ó libro Aturuxos.
Colección de cantares gallegos de Ramón Armada Teixeiro (La
Habana, Imp. y Papelería La Universal de Ruíz y Hno.,
1898).