Baixar aquí o pdf - Consello da Cultura Galega

Curros Enríquez: Cronobiografía 609
Curros critica a actuación do Goberno español e dos seus
ministros andaluces, ós que acusa de sacrificar “a una localidad
la Nación entera”, denuncia a preponderancia na
gobernación do Estado da “raza menos apta para gobernar,
que es la del Mediodía, sobre las del Norte y del Occidente”
e refírese á falta de responsabilidade criminal para o caso
dos ministros que cometesen erros punibles ó lesiona-los
intereses públicos cos seus actos ou decisións. A publicación
deste artigo tivo como consecuencia que o periódico
fose multado polo gobernador da Habana, J. Porrúa, feito ó
que Curros responde con outro editorial, titulado “Nuestra
multa”. O 24 de outubro tramítase unha segunda multa.
Logo de non obter resposta o recurso de alzada interposto
o 1 de novembro perante o capitán xeneral da illa,
Valeriano Weyler Nicolau, e afectada tamén polas numerosas
baixas de subscritores que sofre a publicación, o 9 de
novembro sae á rúa o número 147 e derradeiro de La Tierra
Gallega. No editorial “A nuestros conterráneos”, Curros
explica as razóns polas cales se ve impelido a pecha-lo
periódico.
Aproximadamente un mes despois da desaparición
de La Tierra Gallega, o noso autor entra como corrector
de probas no Diario de la Marina, recomendado –de
acordo con Calveiro– polo seu compatriota Manuel del
Hierro y Mármol e por mediación de Prudencio Rabell,
daquela presidente da citada empresa. Posteriormente,
Curros pasará a formar parte (Calveiro sinala que a finais
de decembro de 1896) da redacción do periódico (aínda
que os seus primeiros traballos foron anónimos, segundo
apunta este mesmo estudioso), destacando pola súa sección
“La Prensa”, creada o 26 de febreiro de 1899 [n.º 49].
Alí publica poemas –reproduccións na súa maior parte–,
editoriais e críticas literarias, soltos, notas necrolóxicas ou
“gacetillas” sobre os máis diversos temas. Calveiro sostén
que dos seus comentarios sobre libros, que asinaba coas
súas iniciais, moi poucos foron incluídos nas Obras completas
do escritor de Celanova.