Baixar aquí o pdf - Consello da Cultura Galega

604 Ana Belén Fortes / Xosé Anxo García López
O 20 de febreiro segundo Alonso Montero,
Calveiro e Vilanova Rodríguez, quen se remite a irrefutable
proba documental (o 21 para Casares ou o 22 para Carré
Alvarellos e C. E. Ferreiro), Curros parte cara a Cuba, ó
parecer con destino México, consonte acreditan Baña Pose
e Martínez-Morás, no vapor Reina María Cristina. A decisión
de Curros semella influenciada ben polas difíciles relacións
coa súa muller (como sostén Ferreiro), ben –como
sosteñen Vilanova Rodríguez ou Adolfo V. Calveiro– polos
serios desgustos que lle carrexa a publicación dun artigo
(ou artigos) en El País, e por evitar un posible proceso, xa
que o artigo en cuestión estaría incurso entre os delictos de
imprenta. Por outra parte, Carré Alvarellos refírese (aínda
que sen lle dar moito creto) á reminiscencia das angustias
experimentadas durante o procesamento para explica-lo
traslado de Curros á outra banda do Atlántico.
Curros arriba na Habana o 5 de marzo. Unha vez
alí, varios amigos anímano a quedar na illa no canto de
continua-la súa viaxe ata México, como tiña previsto.
Pouco tempo despois (desde maio e ata o mes de outubro,
testemuña Calveiro), o escritor de Celanova comeza a traballar
en El Diario de la Familia, do que era redactor-xefe (e
onde segundo este biógrafo o facía practicamente todo). De
acordo con Calveiro, o seu primeiro número (prospecto) é
do 1 de abril, mentres que o primeiro número da serie
correspondería ó 1 de maio. O nome de Curros aparece por
última vez como redactor-xefe no n.º 133, datado o 2 de
outubro. Neste periódico reproduce Curros algunhas das
traduccións de poetas portugueses que apareceran por primeira
vez en El Imparcial, entre 1883 e 1886, baixo o epígrafe
de “Lira lusitana”.
Á parte do referido, o noso autor funda a publicación
La Tierra Gallega, que se pon en circulación o 8 de
abril, un mes despois da súa chegada á illa, cunha periodicidade
quincenal durante 1894, e semanal en 1895 e 1896.
O Centro Gallego da Habana faino socio honorario desde a
súa chegada. Carré Alvarellos insinúa que lle ofrecen un
traballo remunerado: a propia Secretaría do Centro, cargo