Baixar aquí o pdf - Consello da Cultura Galega

594 Ana Belén Fortes / Xosé Anxo García López
castelán “A la hermosa niña Rosario Caneda y Fernández” e
“Nihil”, texto este último reproducido posteriormente en El
Eco de Galicia (La Habana, 22/02/1885).
1879 Tras numerosas vicisitudes, publícase a Corona fúnebre de
Vesteiro Torres, con prólogo de Curros, Ferrol, Imp. de El
Correo Gallego, 1879 (1880 para López Varela). Inclúe o
“Ensayo necrológico-biográfico” de Curros Enríquez (pp.
9-30), escrito en Madrid en xaneiro de 1877.
O 18 de maio, a Compañía Infantil de Teatro de
Luis Blanc dá unha función extraordinaria no Teatro
Principal de Ourense. No intermedio, as señoritas Megia e
Gómez len composicións de Neira de Cancela e Curros
escritas expresamente para a ocasión. O texto de Curros
sería recollido no tomo II das súas Obras completas co título
“A la compañía dramática infantil de Luis Blanc”.
Prevese a inauguración en setembro dun monumento
a Feijoo en Ourense. A Comisión organizadora do
citado monumento (un busto de bronce realizado polo
artista Guisasola), formada polo marqués de Trives e por
outros intelectuais de Ourense, encárgalle a Curros que
escriba un texto para a compañía de Luis Blanc. O noso
autor leva a cabo o encargo nun prazo de vintecatro horas,
tralo cal fará unha lectura deste ante os membros da devandita
comisión.
O 3 de xuño estréase con grande éxito no Teatro
Principal de Ourense esta loa dramática, titulada El Padre
Feijoo, que será impresa nesta mesma cidade ó ano seguinte.
Na crítica de El Heraldo Gallego (5/07/1879) lemos que
o señor Llorens leu dúas poesías de Neira Cancela e de
Jesús Muruais dedicadas a Curros, e que Juan Manuel Paz
Novoa fixo entrega dunha coroa de loureiro destinada ó
poeta, quen por discreción se ausentara do lugar momentos
antes. De acordo con Alberto Vilanova Rodríguez, a
peza teatral represéntase por segunda vez no mesmo escenario
antes de remata-lo mes, aínda que esta vez é levada
ás táboas pola compañía lírico-dramática do barítono
ourensán Maximino Fernández, consonte a noticia recollida
na “Revista de prensa” do periódico El Trabajo.