Baixar aquí o pdf - Consello da Cultura Galega

Curros Enríquez: Cronobiografía 593
–varios autores sosteñen que Curros non puidera publicala
alí porque o tema non gustaba–, está dedicada ó tamén
escritor celanovés Leonardo Mármol e xa fora publicada o
ano anterior como folletín polo xornal coruñés El
Telegrama. Linares Rivas no seu Discurso de ingreso en la
Academia Española dá unha estraña versión –recollida por
Vilanova Rodríguez e Carré Alvarellos– segundo a cal
Curros se vira obrigado por parte do periódico que a
publicaba a traslada-la acción da novela, que tiña lugar en
Navarra, á Coruña, cambiando simplemente uns nomes
por outros, coa conseguinte secuencia de disparates xeográficos,
toponímicos e descritivos. Non obstante, a versión
que hoxe coñecemos, publicada no tomo cuarto das
Obras completas do noso autor, non recolle ningunha das
incoherencias aludidas, aparecendo A Coruña e Navarra
ben diferenciadas.
O 20 de abril morre en Madrid Francisco Añón.
Alonso Montero apunta que a composición de Curros
“Conjuro sobre la tumba del poeta Añón” é publicada o 5
de maio no número extraordinario que El Heraldo Gallego
dedica á memoria deste poeta galego.
Os días 25 e 31 de marzo Curros publica en El
Heraldo Gallego (n.º 255 e 256) os traballos en prosa “La
señorita de aldea (I e II)”, cadro de costumes pertencente a
unha serie de dezaseis traballos de distintos autores, o cal
responde ó proxecto orixinal da Sociedade “Galicia
Literaria” de publicar un libro titulado Los gallegos pintados
por sí mismos. En 1883, El Correo Gallego de Ferrol publica
en folletón este traballo.
O 31 de maio aparece en El Heraldo Gallego n.º
267 o poema “A Marina. Serenata fúnebre”. Algunhas fontes
sinalan que o antedito texto foi composto en Madrid o
9 de setembro de 1877, ben que hai quen sitúa este
momento no 9 de setembro de 1875.
Carré Alvarellos salienta que Curros colabora nesta
altura na publicación coruñesa La Aurora de Galicia.
Almanaque literario para 1878 (A Coruña), que coordinaba o
seu amigo Leonardo Mármol, onde ven a luz as poesías en