Baixar aquí o pdf - Consello da Cultura Galega

Curros Enríquez: Cronobiografía 589
O 30 de setembro deste ano, El Heraldo Gallego
reproduce o poema de Curros “A la memoria de mi amiga
la señorita Doña Modesta Méndez Brandón. Elegía”, composto
en Madrid o 6 de setembro de 1875. A data de publicación
deste texto coincide coa inauguración da Sociedade
“Galicia Literaria”, da cal Curros será membro. Nesta sesión
le os poemas “A la poetisa gallega Doña Emilia Calé y
Torres de Quintero...” (publicado en El Heraldo Gallego, n.º
95, 21/10/1875), “A una amiga” e “Ante la estatua de
Feijoo”. Na reunión coñece a Añón, presidente da entidade,
a quen se verá axiña unido por fortes lazos de amizade.
Na velada celebrada o 20 de outubro, Curros oponse a
Añón no proxecto de “Los gallegos pintados por sí mismos”
e ten un forte encontrón con Andrés Muruais. Un mes despois,
na reunión do 20 de novembro, Curros dá a coñece-
-la composición “Sobre el abismo”.
Nesta altura, Curros frecuenta a Biblioteca
Nacional, de acordo con Melendo Abad e González-Besada.
El Imparcial destina ó noso autor como correspondente
de guerra, quen a finais deste ano é enviado á fronte
do Norte, acompañando ó exército liberal do xeneral
Moriones. Desde alí remitirá as súas “Cartas del Norte”. A
primeira das crónicas está datada en Santander o 19 de
decembro do ano en curso, mentres que a última é do 23
de febreiro de 1876.
1876 Fin das guerras carlistas.
Apróbase a Constitución de 1876.
O 30 de xaneiro disólvese a Sociedade “Galicia
Literaria”. O 27 de febreiro morre a súa irmá Teresa.
Calveiro sostén que o noso autor non terá coñecemento
desta morte ata o 1 de marzo seguinte, que figura como
data de composición do poema “¡Teresa!, poesía” (El
Heraldo Gallego, 12/04/76) nas Obras escogidas que publicará
o seu fillo Adelardo en 1956. Nesta altura, sofre un
accidente que está a punto de custarlle a vida, ó recibir un
disparo no peito (ó parecer a causa dunha broma pesada
que lle gasta o axudante do brigadier Mariné). Unha vez
reposto, regresa a Madrid.