Baixar aquí o pdf - Consello da Cultura Galega

588 Ana Belén Fortes / Xosé Anxo García López
que aparecerá posteriormente en Aires da miña terra, entre
elas a dedicatoria a Lamas Carvajal.
O 2 de maio estrea (en opinión dalgún estudioso
gracias a Modesto Fernández González) El dos de mayo de
1808. Loa original y en verso, no Teatro de Novedades de
Madrid, loa dramática representada con extraordinario
éxito pola Compañía de Francisca Carbonell e Julio
Fuentes. Algunhas fontes testemuñan que, o día da estrea,
o exército liberal rompía o cerco de Bilbao, razón pola cal
nos periódicos pasaría desapercibida a representación desta
obra teatral.
Antes de que remate o ano, sairá dos talleres da
Imprenta de José Rodríguez de Madrid a versión escrita da
loa, asinada en colaboración con Leopoldo Vázquez, cuñado
do poeta. Na Biblioteca Nacional atópase un dos poucos
exemplares, quizais o único, que se conserva desta obra,
dedicada “Al Excmo. Sr. Director general, generales, jefes y
oficiales del Cuerpo de Artillería”. Na obra aprécianse
influencias de José Zorrilla e Manuel José Quintana, ademais
da inspiración na elexía heroica “Al dos de Mayo”, de
Bernardo López.
O 18 de xuño publica o poema “A nena na fonte”
en El Heraldo Gallego (n.º 25). O 3 de xullo reedita a oda “A
la Guerra Civil” (publicada por primeira vez en outubro do
ano anterior en El Correo de Galicia, Ourense) na sección
“Los Lunes” do xornal madrileño El Imparcial. Esta circunstancia
vai propicia-lo seu ingreso na redacción do
devandito periódico, onde de reporteiro de noticias pasará
a ser cronista de guerra.
Antes de que remate o ano verá a luz o soneto en
castelán titulado “A los vates gallegos, en la Corona fúnebre
de Méndez Núñez”, inserido na Corona poética dedicada a la
inmortal memoria del ilustre marino gallego D. Casto Méndez
Núñez, Ourense, Imp. de El Heraldo Gallego, 1874.
1875 Restauración da monarquía en España: proclamación de
Alfonso XII.
Publícase Espiñas, follas e froles de Lamas Carvajal.