Baixar aquí o pdf - Consello da Cultura Galega

Curros Enríquez: Cronobiografía 587
O 15 de xullo nace o primoxénito do noso autor,
que levará os nomes de Adelardo Ramiro Jaime, acontecemento
que Curros celebra co poema “Ben chegado”.
Estrañamente, Vilanova Rodríguez e mais Melendo Abad e
González-Besada discrepan do resto dos biógrafos de
Curros: o primeiro dá o día 19 dese mes e ano como data
de nacemento do neno, namentres que os outros apuntan
erradamente que o primeiro fillo de Curros veu ó mundo
en xullo de 1878.
Curros inicia en agosto unha serie de colaboracións
coa publicación ourensá El Correo de Galicia, na que
verán a luz os poemas “El itinerario. Confidencia” (n.º 63,
20/08/1873), “El canto de la República” (composición coa
que celebra a proclamación da I República, n.º 70,
25/09/1873) e “La guerra civil. Oda” (n.º 77, 30/10/1873).
1874 O 3/01/1874 cae a I República. Curros é destituído como
redactor da Gaceta de Madrid. Xesús Alonso Montero sinala
que o seu cesamento debeu producirse en xaneiro, coincidindo
co derrubamento da I República. O 10 de xaneiro
Curros publica nas páxinas de El Correo de Galicia (n.º 90)
o poema “Contraste”, composto en Madrid. A este seguirán
no mesmo medio “La primera cana” (n.º 98,
25/02/1874, composición que non hai que confundir coa
homónima de 1877), “La despedida. Oriental” (n.º 104,
31/03/1874), “En la temprana muerte del niño J.V.B.” (n.º
120, 20/06/1874) e “Vacilaciones. Emilio” (n.º 132,
21/08/1874). Segundo Carballo Calero, este ano publica o
poema “A fouce d’o abó”, en El Heraldo Gallego, dato que
non puidemos contrastar ó non encontra-lo devandito
número desta publicación. Sen embargo, sabemos que
tamén foi reproducido na revista ourensá Álbum literario
(n.º 2, 12/02/1888).
Á marxe do referido, Curros publica por entregas
El Maestre de Santiago, lenda en verso de filiación romántica
composta en 1869, no periódico El Heraldo Gallego (n.º
5 ó 44, 29/01/1874 ó 5/11/1874). O 9 de abril publica o
poema “A primaveira” en El Heraldo Gallego (n.º 15), versión
inicial que presenta algunhas diferencias respecto da