Baixar aquí o pdf - Consello da Cultura Galega

542 Antonio Piñeiro
27 de decembro de 1985. Renace o Patronato: Non tivo que
pasar sequera un ano para que un fato de persoas ligadas ós
ambientes culturais de Celanova se reunisen no despacho do alcalde
desta vila, Adolfo Vázquez Rivero, e acordasen facer renacer o
devandito Patronato, despois de que o anterior alcalde, Gregorio
Álvarez Medela, mantivese no seu poder o legado documental dos
antigos membros do colectivo.
Nestes intres o novo Patronato constitúese coa presencia
do propio alcalde, Adolfo Vázquez, o concelleiro de Cultura,
Manuel Álvarez Pérez, Xosé Manuel del Caño, que sería designado
secretario, o crego de Celanova, Cesáreo Iglesias, o presidente de
Caixa Ourense, José Posada González, Xulio Rodríguez e Francisco
Saa en representación da Consellería de Cultura da Xunta de
Galicia, Isabel Ingelmo Hierro, naquel intre correspondente do
xornal La Voz de Galicia, Celso Montero Rodríguez, Xosé Benito
Reza Rodríguez, Xosé Luís Méndez Ferrín e Antonio Piñeiro
Feijóo, naquel momento correspondente do xornal La Región. No
transcurso do acto decidiuse nomear presidente de honra do novo
Patronato a Gumersindo Fernández García, o único membro vivo
do Patronato inicial.
Daba comezo aquí o que poderiamos denominar a
segunda etapa histórica do Patronato Curros Enríquez, que viviu
unha non menos longa serie de acontecementos encamiñados
sempre a conseguir un acordo cos propietarios da parte non pertencente
á Unión Orensana, co fin de facer da casa o Museo que
todos desexabamos.
14 de xullo de 1986. Novos estatutos: Varias reunións entre os
compoñentes desta nova xunta directiva dan como resultado a
aprobación e legalización, pola vía das asociacións culturais, dos
novos estatutos, que coinciden basicamente cos elaborados en
1953 polos orixinarios fundadores do colectivo e que teñen como
máximo obxectivo o de “mercar, restaurar e converter en museo a
casa de Manuel Curros Enríquez”.