Baixar aquí o pdf - Consello da Cultura Galega

Intrahistoria da casa dos poetas... 525
31 de xullo de 1921. Ponse á venda a Casa: Mentres as homenaxes
e os recordos anuais se suceden cada vez que chega o mes
de marzo, a casa segue o seu rumbo solitaria, camiño dun silencio
que había manterse xordo aínda moitos anos. Coa presencia dun
matrimonio alleo á familia –o formado por Benjamín Martínez
Freire e a súa dona– dentro do fogar do vello Calcorra e cos herdeiros
deste que aínda manteñen parte da propiedade residindo
fóra de Celanova, non é de estrañar que a sobriña do poeta, Pilar,
e o seu home, Serafín Feijóo, que xa se viran na obriga de hipotecala
para saldar problemas económicos importantes, acaben anunciando
a súa venda. Entre este ano e 1924, o xornal La Región faise
eco da oferta en diversas ocasións, o que xera –novamente o
mundo da emigración érguese en defensor da memoria do escritor–
a reacción dos ourensáns residentes na Habana, que fan unha
chamada á colaboración para se faceren co edificio. A parte de casa
que sae á venda consta de 24 departamentos e horta e o prezo de
saída é de 10 mil pesetas, segundo informa o comerciante referido,
Serafín Feijóo.
4 de outubro de 1921. Empeza a mobilización en Cuba: A
nova, como queda dito, chega á Habana e o xornal Heraldo de
Galicia deste día faise eco a través dunha chamada “a los orensanos
en particular y a los gallegos en general, radicados en Cuba”.
Di así:
En el número 44 de “Heraldo de Galicia” se publicó la noticia,
tomada de un diario de Orense, de que la casa en donde nació en
Celanova el inmortal poeta Curros Enríquez, está puesta en venta por
la cantidad de diez mil pesetas. Mucho nos ha llamado la atención
este hecho. Y nos la ha llamado, porque nunca hubiéramos pensado
que la casa en que nació Curros se encontrase a estas alturas, como se
encuentra: en espera de un comprador. Nosotros suponíamos que de
no ser de los familiares de Curros Enríquez, que la podían guardar
como recuerdo de familia, debía ser del municipio de Celanova, para
dedicarla, sino a escuela porque no reúna condiciones apropiadas,
por lo menos a monumento nacional. Es lo menos que pudiera hacer
su municipio.