Baixar aquí o pdf - Consello da Cultura Galega

Curros Enríquez e o seu cabodano... 381
“Falando de Curros” (cfr. apéndice, texto 19). Casas eríxese, sen
dúbida, no ensaísta e xornalista que en máis ocasións, desde a tribuna
de A Nosa Terra como director, desde as páxinas do Heraldo
de Galicia, como participante nos actos cívicos do cemiterio de
Santo Amaro ou como home de pensamento e acción, se pronunciou
reivindicando o exemplo currosiano como válido e operativo
para o seu tempo. Neste texto non vén máis que a incidir no xa
sinalado noutras ocasións por el, isto é, considerar a Curros baixo
o criterio de poeta cívico. Coas derradeiras palabras deste artigo
seu quero concluír, reivindicando tamén o seu exemplo cívico,
como é ben sabido mártir en 1936 polas súas ideas..., ideas que
eran as mesmas que el defendía naqueles actos e escritos conmemorativos,
que en definitiva eran as de Curros. Di Víctor Casas:
Con aitos púbricos como o que celebra todol-os anos no mes de
Marzal o conceito de liberdade e galeguismo vai aniñando
fervorosamente no corazón dos galegos de hoxe a quenes
correspondemos abranguer na sua totalidade o trunfo da idea que
Curros inmortalizou nos seus versos que son vieiro luminoso que,
como un novo Camiño de Santiago, siñala os vieiros de Galicia do
porvir.