Baixar aquí o pdf - Consello da Cultura Galega

Curros Enríquez e o seu cabodano... 371
mación da propia personalidade a través do camiño iniciado polos
artistas que estimulan a seguir o labor de rexeneración –“Este
homenaxe de hoxe sinifica que Galicia encomenza de novo á ser”–.
A novidade virá dada pola engádega informativa que aparece no
mesmo soporte e na que se dá conta de que estas homenaxes
comezan a se celebrar noutras vilas e concellos. Desta vez dáse
noticia dos actos celebrados na homenaxe tributada ao vate celanovés
na Alameda de Vigo na que, oficialmente, participaron o
alcalde Gregorio Espino, o mestre Víctor Fraiz, Rodríguez Elías e
Garra, actos que terían continuidade en anos seguintes no que
supón un intento de xeneralizar a dimensión sociolóxica e reivindicativa
destes actos en toda Galicia.
En 1927 reitérase a organización do acto coruñés mudando,
nesta ocasión, os participantes, fóra do alcalde Casas, que repite
a súa presencia. Panisse, secretario do Círculo de Artesanos, e
mais Alfredo Somoza, pola Irmandade, foron as novidades. Deste
último recóllese un longo discurso dun sorprendente radicalismo
ideolóxico en plena dictadura de Primo de Rivera, no que o símbolo
de Curros se ergue como imaxe redentora do idioma e da
liberdade. Velaquí un fragmento:
...os tempos impoñen a obriga de calar deixando que somentes se
escoiten voces pronunciadas nun tono que seguramente non cadran
coas ansias ideolóxicas dos galegos a quenes homenaxeamos.
(...) Porque é forzoso mostrar que os mais grandes afás d’estes homes
que honran ao noso país foron a exaltación do noso patrimonio que
fixa as nosas condiciós características, a nosa historia, os nosos
costumes, as nosas tradiciós, o noso idioma. E xunto con este
patrimonio o amor â libertade, â santa Libertade que é Amor, que é
Tolerancia, que é sacrificio, que é respeto pra todo e pra todos...
Con ocasión do vixésimo aniversario do falecemento de
Curros os actos de lembranza curriosana revestirán unha nova
dimensión. Tal e como se informa no número 247, do 1 de abril
de 1928, sen referencias á manifestación cívica que é de supoñer
que se celebrase, a “Universidade Popular Coruñesa” e mais a
Irmandade da Fala convidou, o dez de marzo, a Ramón Otero