Baixar aquí o pdf - Consello da Cultura Galega

CURROS ENRÍQUEZ E O SEU CABODANO
NA PRENSA GALEGUISTA DE PREGUERRA
(DISCURSOS, PROSAS E POEMAS)
Ramón Nicolás Rodríguez
IES n.º 2 – Vigo (Valadares)
Cómpre iniciar este relatorio facendo referencia ao feito de
que o meu principal centro de interese é o de rastrexar o eco que
unha serie de homenaxes tributadas a Curros obtivo na prensa
galeguista de preguerra, nomeadamente nas páxinas de A Nosa
Terra, as sucintas referencias contidas en El Momento, xornal coruñés
dirixido por Manuel Luís Acuña, e mais no Heraldo de Galicia.
Estas referencias contribúen a transmitir a innegábel vivacidade, o
fondo herdo que deixou e mesmo a vagarosa transformación en
modelo vital e literario que se opera arredor da figura de Curros e
as dimensións que esta foi adquirindo para o pensamento nacionalista
desde o seu falecemento ata o ano 1936 basicamente, atendendo
á presencia, á recordación e lembranza que se reflicte nas
abondosas referencias, crónicas, discursos, prosas e poesías suscitadas
por estas homenaxes aínda que aquí non as expoña dun xeito
exhaustivo.
Sen dúbida, se houber algunha cousa interesante nestas
reflexións esta será a exhumación dos textos aos que me referirei,
respecto dos cales e por unha cuestión lóxica de limitación só
comentarei algúns fragmentos, aínda que a totalidade deles vaian
incluídos no apéndice deste relatorio.
Nesta análise, por idénticas causas constritivas, optei por
prescindir do que coido que sería un rendíbel traballo como é o
profundamento nas páxinas dunha serie correlativa de números de
A Nosa Terra, inmediatamente posteriores ao falecemento do poeta
en Cuba, isto é, pertencentes á época en que o soporte era un
semanario rexionalista fundado no seo do sector galeguista de
Solidaridad Gallega. Efectivamente aí reflíctese –como tamén o foi
nos actos de coroación do poeta en 1904– a auténtica dimensión
como poeta nacional e popular de Curros Enríquez a través da
fonda manifestación de dó que o pobo galego, e concretamente o